قارجى پيراميداسىن قۇرۋعا قاتىسقان بلوگەرلەر مەن ۆاينەرلەر جازاعا تارتىلۋى مۇمكىن
بۇل تۋرالى ەلىمىزدىڭ باس پروكۋرورى عيزات نۇرداۋلەتوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ايتتى. «باياندالعانمەن قاتار، تەرگەۋ بارىسىندا بلوگەرلەردىڭ، ۆاينەرلەردىڭ جانە باسقا دا اتاقتى ادامداردىڭ قارجى پيراميداسىن قۇرۋعا قاتىستىلىعى انىقتالعان جاعدايدا قىلمىستىق قۋدالاۋ ورگاندارى ولاردىڭ ارەكەتتەرىنە ءتيىستى قۇقىقتىق باعا بەرۋ جانە كومەكتەسكەنى ءۇشىن قىلمىستىق جاۋاپقا تارتۋ تۋرالى ماسەلەنى شەشۋ قاجەتتىگىنە باعدارلانعان»، - دەپ جازىلعان جاۋاپتا.
ونىڭ ايتۋىنشا، قىلمىستىق كودەكستىڭ 28-بابى 5-بولىگى بۇعان مۇمكىندىك بەرەدى.
«قارجى پيراميدالارىنا قارسى ءىس- قيمىل بويىنشا ءتيىمدى شارالار ازىرلەۋ ءۇشىن قۇرامىندا باس پروكۋراتۋرا، ءى ءى م، قارجىمينى، ا ق د م، ۇلتتىق بانك وكىلدەرى بار ۆەدومستۆوارالىق جۇمىس توبى قۇرىلعانىن حابارلايمىز. جۇمىس توبى اياسىندا ازاماتتىق قوعام ينستيتۋتتارىن تارتا وتىرىپ، ىنتىماقتاستىق تۋرالى مەموراندۋم ازىرلەنىپ، مەديا- جوسپار بەكىتىلدى»، - دەلىنگەن باس پروكۋروردىڭ جاۋابىندا.
سونداي-اق، ول جەكە تۇلعالاردىڭ قارجى ۇيىمدارىن جارنامالاۋعا زاڭنامالىق تىيىم سالۋدى ەنگىزۋ ماسەلەسى دە قارالىپ جاتقانىن ايتادى.
«بيىل 4-ناۋرىزدا زاڭدىلىقتى، قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسى وتىرىسىندا وسى ماسەلە تالقىلانىپ، جاۋاپتى مەملەكەتتىك ورگاندارعا ءبىرقاتار ۇسىنىمدار بەرىلدى»، - دەدى عيزات نۇرداۋلەتوۆ ءماجىلىس وكىلدەرىنە بەرگەن جاۋاپتا.
اۆتور: ەسىمجان ناقتىباي
