داۋرەن ابايەۆ ۆاكسيناتسيا ماسەلەسىندەگى ادام قۇقىعىنا قاتىستى ايتتى

نۇر-سۇلتان. قازاقپارات - پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ «اشىق ديالوگ» الاڭىندا ۆاكتسينالاۋ ىسىندەگى مەملەكەتتىڭ ۇستانىمى تۋرالى پىكىر ءبىلدىردى، دەپ حابارلايدى قازاقپارات.

«بۇل جەردە جالعىز جول بار. مەملەكەت ەكپە العان ازاماتتار ءۇشىن الەۋمەتتىك باسىمدىقتاردىڭ ءتىزىمىن بىرتىندەپ، اسىرا سىلتەۋسىز كەڭەيتە بەرەدى. قوعامدىق ورىندارعا بارۋ، ساپارعا شىعۋ مۇمكىندىكتەرى ەكپە العانداردا كوبىرەك بولادى. ادام قۇقىقتارىن بۇزۋ ماسەلەسىنە كەلسەك، ءقازىر بۇل ءبىزدىڭ ەلدە عانا ەمەس، بۇكىل الەمدە وزەكتى بولىپ تۇر. باتىس باسپا ءسوزىن وقىساڭىز، ول جاقتا ەكپە الماعان ادامداردى جۇمىستان قۋىپ جاتىر. ءبىراق ەشكىم كونستيتۋتسيالىق قۇقىعى شەكتەلگەنىن ايتىپ، شاعىمدانىپ جاتقان جوق. كەرىسىنشە، ۆاكسيناتسيا ادامنىڭ قاۋىپسىزدىگىمەن بايلانىستى بازالىق قۇقىعىن قورعايدى»، - دەدى داۋرەن ابايەۆ.

پرەزيدەنت اكىمشىلىگى باسشىسىنىڭ ورىنباسارى سكەپتيكتەردىڭ ۆاكسيناتسياعا قارسى كەلتىرىپ جۇرگەن ارگۋمەنتتەرىن ميفكە تەڭەدى.

«مەن ولاردى ارگۋمەنت دەگەنشە - ميف دەر ەدىم. ساۋالنامالارعا سۇيەنسەك، بىزدە ۆاكسينالاۋعا قاتىستى سكەپتيتسيزم افريكا ەلدەرىنە قاراعاندا جاقسىراق. مىسالى، كوپ ادامدار ءدىني پايىمىنا بايلانىستى ۆاكتسينا العىسى كەلمەيدى. ءبىراق ءبىزدىڭ ەلدەگى بارلىق كونفەسسيالاردىڭ باسشىلارى ۆاكتسينا مەن ءدىني قاعيدالار اراسىندا قايشىلىق جوق ەكەنىن راستادى. الەمدەگى ەڭ ءبىر ءدىني مەملەكەت - ساۋد ارابياسى. سول ەلدىڭ وزىندە قاجىلىققا بارۋ ءۇشىن ۆاكتسينا پاسپورتىن سۇرايدى»، - دەدى داۋرەن ابايەۆ.

سونداي-اق، ول الەۋمەتتىك جەلىدە ۆاكتسينا السا دا، ۆيرۋس جۇقتىرعان ادامدار تۋرالى تاراعان اقپاراتتارعا تۇسىنىك بەردى.

« ءيا، شىنىمەن ونداي جايتتار بار. بىرىنشىدەن، ونداي ادامدار سىرقاتتى الدەقايدا جەڭىل وتكەرىپ جاتىر. ەكىنشىدەن، ۆاكسيناتسيا كورسەتكىشى جوعارى ەلدەردىڭ ساتيستيكاسى ۆيرۋس جۇقتىرعان 1000 ادامنىڭ بەسەۋى عانا ۆاكسينا سالعىزىپ ۇلەرگەنىن كورسەتىپ وتىر. الەۋمەتتىك جەلىدەگى قورقىنىشتى اقپاراتتاردىڭ كوبى - فەيك. جۋرناليستەر سونىڭ ءبارىن جوققا شىعارىپ ۇلگەرمەي جاتىر. ءبىر فەيكتىڭ بەتىن اشسا، ورنىنا تاعى ۇشەۋى پايدا بولا كەتەدى. سوندىقتان ۆاكسينالاۋدىڭ پايداسىن ءتۇسىندىرۋ ىسىندە جۇيەلى جۇمىس قاجەت»، - دەدى داۋرەن ابايەۆ.