قاسىم-جومارت توقايەۆ شۆەيتساريانىڭ ىسكەر توپتارى وكىلدەرىمەن كەزدەستى

نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ شۆەيتساريانىڭ ىسكەرلىك توپتار وكىلدەرىمەن كەزدەسۋ وتكىزدى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

جيىندى اشقان مەملەكەت باسشىسى شۆەيتساريا قۇراما كومانداسىنىڭ فۋتبولدان ءوتىپ جاتقان ەۋروپا چەمپيوناتىندا جاقسى ويىن ورنەگىن كورسەتكەنىن اتاپ ءوتتى.

پرەزيدەنت شۆەيتساريا كونفەدەراتسياسى قازاقستاننىڭ ەۋروپاداعى ماڭىزدى ساۋدا-ەكونوميكالىق سەرىكتەستەرىنىڭ ءبىرى ەكەنىن ايتتى.

- ەلدەرىمىز اراسىنداعى قارىم-قاتىناستار دوستىق پەن ءوزارا سەنىمگە نەگىزدەلگەن. بۇگىنگى كەزدەسۋدى شۆەيتساريا پرەزيدەنتى گي پارمەلانمەن بەينە بايلانىس ارقىلى وتكەن جۋىرداعى كەلىسسوزدىڭ كونسترۋكتيۆتى جالعاسى رەتىندە قاراستىرامىن. ءبىز ساۋدا بايلانىستارىمىزدى، ينۆەستيتسيالىق ىنتىماقتاستىعىمىزدى نىعايتۋ ءۇشىن جۇمىس ىستەۋگە، اتالعان سالالار بويىنشا جەتىستىككە قول جەتكىزۋگە ۋاعدالاستىق. قازاقستان تاۋەلسىزدىگىن العان ۋاقىتتان بەرى شۆەيتساريا ەكونوميكامىزعا 30 ميلليارد دوللارعا جۋىق ينۆەستيتسيا سالدى. ەكى مەملەكەت اراسىنداعى تاۋار اينالىمى، ءتىپتى، بىلتىرعى داعدارىس كەزىندە 1,7 ميلليارد دوللار بولدى، - دەدى پرەزيدەنت.

قاسىم-جومارت توقايەۆ بۇگىندە قازاقستاندا شۆەيتساريا كاپيتالىنىڭ قاتىسۋىمەن 400 دەن استام كاسىپورىن جۇمىس ىستەپ جاتقانىنا توقتالدى.

- قارىم-قاتىناستارىمىز بەن ىنتىماقتاستىعىمىزدا بەلگىلى ءبىر جەتىستىكتەر بار دەپ سانايمىن. سونىمەن قاتار مۇنى ودان ءارى دامىتۋ ءۇشىن الەۋەتىمىز دە جەتكىلىكتى. قازاقستان تىكەلەي ينۆەستيتسيا تارتۋ ءۇشىن ەلىمىزدەگى ينۆەستيتسيالىق كليماتتىڭ مەيلىنشە قولايلى بولۋىنا بارلىق مۇمكىندىكتى جاسايدى. قازاقستان - ايماقتاعى ەكونوميكاسى ەڭ ءىرى مەملەكەت. ءبىزدىڭ ماقساتىمىز - ايماقتاعى جەتەكشىلىك ورنىمىزدى ساقتاپ قالۋ. سونىمەن قاتار ەكونوميكامىزدى ءارتاراپتاندىرۋعا بايلانىستى ماسەلەلەردى شەشۋىمىز كەرەك، - دەدى قاسىم-جومارت توقايەۆ.

پرەزيدەنتتىڭ ايتۋىنشا، قازاقستاندا ەكونوميكانى كومىرتەگىنەن ادا ەتۋگە، جاسىل تەحنولوگيالارعا، قورشاعان ورتا مەن قارجى سالاسىن قورعاۋعا بايلانىستى جوبالارعا باسىمدىق بەرىلەدى.

كەزدەسۋ بارىسىندا Stadler Rail AG كومپانياسىنىڭ پرەزيدەنتى، قازاقستان مەن شۆەيتساريا ىسكەرلىك كەڭەسىنىڭ تەڭ ءتوراعاسى پەتەر شپۋلەر، Glencore International AG كومپانياسىنىڭ باس ديرەكتورى ايۆان گلازەنبەرگ، Roche Holding كونسەرنىنىڭ باسقارما ءتوراعاسى كريستوف فرانتس، Credit Suisse Switzerland ينۆەستيتسيالىق بولىمشەسىنىڭ باسشىسى يەنس حااس، ABB Switzerland كومپانياسىنىڭ باس ديرەكتورى روبەرت يچنەر، KS Genetics كومپانياسىنىڭ پرەزيدەنتى فيليپپو لومباردي، INOKS Capital كومپانياسىنىڭ باس اتقارۋشى ديرەكتورى نابيل ابدۋل-ماسسيح جانە Rey Group كومپانياسىنىڭ پرەزيدەنتى كريستيان رەي ءسوز سويلەدى.