قازاقستاندا ءتورت جارىم مىڭنان استام ادامنىڭ جەكە كۋالىگى بولماعان
«ءبىزدىڭ مينيسترلىك وتكەن جىلدىڭ قازان ايىنان باستاپ ۇكىمەتتىك ەمەس ۇيىمدار، ادام قۇقىعى جانە زاڭدىلىقتى ساقتاۋ تۋرالى حالىقارالىق بيۋرو جانە «سەزىم - ايەلدەر باستاماسى» قۇقىق ورتالىعىمەن بىرلەسىپ، ەل اۋماعىندا جەكە قۇجاتسىز جۇرگەن ازاماتتاردى انىقتاۋ ماقساتىندا كەڭ اۋقىمدى اكتسيا ۇيىمداستىردى. اكتسيانىڭ ناتيجەسىندە قازاقستاندا قۇجاتسىز 4686 ادام انىقتالدى. ولار نەگىزىنەن الماتى، قاراعاندى، تۇركىستان، اقمولا جانە جامبىل وبلىستارىندا تۇرعان. بۇگىندە قۇجاتسىز وسى ازاماتتاردىڭ 3408 نە جەكە كۋالىك بەرىلدى. ال قالعان 1278 ادامدى قۇجاتتاندىرۋ جۇمىسى ءجۇرىپ جاتىر»، - دەدى ق ر ءى ءى م كوشى- قون كوميتەتى ءتوراعاسىنىڭ ورىنباسارى سابىرجان سەيىتجانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سونداي-اق، كوشى- قون كوميتەتىنىڭ وكىلى قۇجاتسىز جۇرگەندەرگە جەكە كۋالىكتى قالاي الۋعا بولاتىندىعى تۋرالى كەڭەسىمەن ءبولىستى.
«ادامدار ومىردەگى ءتۇرلى جاعدايلاردىڭ سالدارىنان قۇجاتسىز قالۋى مۇمكىن. قانداي جاعدايدا بولماسىن كەز كەلگەن ادامنىڭ جەكە كۋالىگى بولۋى ءتيىس. ونسىز ەشقانداي كومەك، قولداۋ الا المايدى، ءتىپتى جۇمىسقا دا تۇرا المايدى. دەمەك، قۇجاتسىز ادام نە ىستەۋ كەرەك؟ ەلىمىزدىڭ بارلىق ايماعىندا كوشى- قون كوميتەتىنىڭ بولىمشەلەرى بار. الدىمەن سول جەرگە بارىپ، ازامات ءوزىنىڭ قۇجاتسىز جۇرگەنىن ايتۋ كەرەك. سول جەردەگى ماماندار ول ازاماتتىڭ مارتەبەسىن انىقتاپ، ۋاقىتشا قۇجات بەرە الادى. سودان سوڭ ازاماتقا قاتىستى تولىق جاعداي انىقتالىپ، ونىڭ نەلىكتەن قۇجاتسىز جۇرگەنى انىقتالعان سوڭ رەسمي تۇردە قازاقستاننىڭ ازاماتى ەكەنىن دالەلدەيتىن جەكە كۋالىك بەرىلەدى»، - دەيدى ول.
اۆتور: ءالي يبرايەۆ
