دوكتورانتۋراعا ءتۇسۋ ەمتيحانى قالاي وتەدى

نۇر-سۇلتان. قازاقپارات – ق ر ءبىلىم جانە عىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ دوكتورانتۋراعا ءتۇسۋ ەمتيحانى قالاي جۇرگىزىلەتىنىن ءتۇسىندىردى، دەپ حابارلايدى قازاقپارات ءتىلشىسى.

«وسى جىلى دوكتورانتۋرادا ۇلكەن وزگەرىستەر بولدى. دوكتورانتۋراعا ءتۇسۋ ەرەجەسىنە وزگەرىستەر ەنگىزىلدى. ونىڭ ىشىندە ءتۇسۋ ەمتيحانى جاڭا فورماتتا وتەدى. دوكتورانتۋراعا قۇجاتتار جوعارى وقۋ ورىندارىنىڭ قابىلداۋ كوميسسيالارى ارقىلى ۇلتتىق تەستىلەۋ ورتالىعىنىڭ سايتىندا قابىلدانادى. ەندى تۇسۋشىلەر ءتۇسۋ ەمتيحاندارىن وڭىرلىك تەستىلەۋ ورتالىقتارىندا كومپيۋتەرلىك فورماتتا تاپسىرادى. كەلەسى كۇنى ەمتيحاننىڭ قورىتىندىسى شىققاننان كەيىن ناتيجەسىمەن كەلىسپەگەن جاعدايدا ءتۇسۋشى اپپەلياتسياعا ءوتىنىش بەرە الادى»، - دەدى ول مينيسترلىكتىڭ اپپارات جينالىسىندا.

دەپارتامەنت باسشىسىنىڭ اتۋىنشا، دوكتورانتۋراعا تۇسكەن ءبىلىم بەرۋ گرانتىنىڭ يەگەرلەرىنىڭ ءتىزىمى جوعارى وقۋ ورىندارىنىڭ سايتتارىندا جاريا ەتىلەدى.

«دوكتورانتۋراعا ءتۇسۋشى تىركەلۋ بارىسىندا جەكە مالىمەتتەرىن تولتىرىپ، ءتۇسۋ جوسپارلانعان ءبىر ءبىلىم بەرۋ باعدارلاماسىن جانە 1 جوعارى وقۋ ورنىن تاڭدايدى. ەمتيحاندى وتكىزۋ ۋاقىتى مەن ورنى ءتۇسۋ ەمتيحانى باستالعانعا دەيىن ۇلتتىق تەستىلەۋ ورتالىعىنىڭ سايتىندا جاريالانادى. دوكتورانتۋراعا ءتۇسۋ ەمتيحانى ەسسە جازۋدان - 20 بالل، وقۋعا دايىندىعىن انىقتاۋعا ارنالعان تەستتەن - 30 بالل جانە بەيىندى ءبىلىم بەرۋ باعدارلاماسى بويىنشا سۇراقتارعا جاۋاپ بەرۋ 50 باللدان تۇرادى. قورىتىندى باعا اتالعان بولىمدەر باللىنىڭ قورىتىندىسىمەن باعالاندى»، - دەدى ادىلەت تويبايەۆ.

اۆتور: مارلان جيەمباي