21:45, 28 - ماۋسىم 2021 | GMT +5
جۇكتى ايەلدەرگە ۆاكسينا سالۋ ماسەلەسى زەرتتەلۋدە - ناريمان تابىنبايەۆ
الماتى. قازاقپارات - قازاقساندا جۇكتى ايەلدەرگە ۆاكسينا سالۋعا رۇقسات بەرىلە مە؟
بۇل ساۋالعا ونلاين بريفينگ بارىسىندا الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ جاۋاپ بەردى، دەپ حابارلايدى قازاقپارات ءتىلشىسى.
ونلاين بريفينگ بارىسىندا ب ا ق وكىلدەرى باسقارما باسشىسىنا قازاقستاندا نەگە جۇكتى ايەلدەرگە ۆاكسينا سالۋعا رۇقسات بەرىلمەي وتىر؟ دەگەن ساۋال قويدى.
ءوز كەزەگىندە ناريمان تابىنبايەۆ جۇكتى ايەلدەرگە ۆاكسينا سالۋ تۋرالى دەنساۋلىق ساقتاۋ مينيسترلىگىنەن بۇيرىق كەلمەگەنىن ءمالىم ەتتى.
«رەسەيدە جۇكتى ايەلدەرگە ۆاكسينا سالۋعا رۇقسات بەرىلدى دەگەن حابار كەلدى، ءبىراق ءبىزدىڭ دەنساۋلىق ساقتاۋ مينيسترلىگىمىزدەن قازاقستاندا دا جۇكتى ايەلدەرگە سالۋعا بولادى دەگەن بۇيرىقتى العان جوقپىز. ول ءالى زەرتتەلىپ جاتىر»، - دەدى ول.
