قازاقستان پرەزيدەنتى ۆالەنتينا ماتۆيەنكونى قابىلدادى
مەملەكەت باسشىسى قاسىم-جومارت توقايەۆ قازاقستانعا رەسمي ساپارمەن كەلگەن رەسەيدىڭ فەدەرالدىق جينالىسى فەدەراتسيا كەڭەسىنىڭ ءتوراعاسى ۆالەنتينا ماتۆيەنكومەن كەزدەسۋ وتكىزدى.
كەزدەسۋ بارىسىندا قازاقستان مەن رەسەي اراسىنداعى كوپجاقتى ستراتەگيالىق سەرىكتەستىك پەن وداقتاستىقتى نىعايتۋدىڭ، پەرسپەكتيۆالارى تالقىلاندى.
سونىمەن قاتار ساۋدا-ەكونوميكالىق، مادەني-گۋمانيتارلىق ىنتىماقتاستىققا، ەۋرازيالىق ينتەگراتسياعا جانە ەكى ەلدىڭ كوروناۆيرۋس پاندەمياسىنا قارسى كۇرەستەگى بىرلەسكەن كۇش-جىگەرىنە قاتىستى وزەكتى ماسەلەلەر ءسوز بولدى.
مەملەكەت باسشىسى فەدەراتسيا كەڭەسىنىڭ دەلەگاتسياسىنا ءىلتيپات ءبىلدىرىپ، ۆالەنتينا ماتۆيەنكونىڭ ەلدەرىمىز اراسىنداعى ەكىجاقتى قاتىناستاردى دامىتۋعا جانە نىعايتۋعا قوسقان ۇلەسىن جوعارى باعالادى.
سونداي-اق ت م د پارلامەنتارالىق اسسامبلەياسى كەڭەسىنىڭ ءتوراعاسى قىزمەتىندەگى جەمىستى ەڭبەگىنە توقتالدى. پرەزيدەنت زاڭ شىعارۋشى ورگانداردىڭ قازاقستان مەن رەسەي اراسىنداعى بايلانىستارىن جاقىنداتۋداعى ءرولىن ەرەكشە اتاپ ءوتتى.
«پارلامەنتتىك ديپلوماتيا مەملەكەتارالىق ىنتىماقتاستىقتى دامىتۋدا ۇلكەن ءرول اتقارادى دەپ سانايمىن. بۇل اسىرەسە، قازاقستان مەن رەسەي فەدەراتسياسى اراسىنداعى ىقپالداستىققا قاتىستى. ءبىز ءۇشىن دوستىق، وداقتاستىق بايلانىستار نەگىزگى باسىمدىققا يە»، - دەدى قاسىم-جومارت توقايەۆ.
سونىمەن قاتار پرەزيدەنت فەدەراتسيا كەڭەسىنىڭ ءتوراعاسىنا ەلىمىزدە ىسكە اسىرىلىپ جاتقان ساياسي جانە ەكونوميكالىق رەفورمالار جونىندە ايتتى.
اڭگىمەلەسۋ بارىسىندا قاسىم-جومارت توقايەۆ رەسەيدىڭ حالىقارالىق ارەناداعى ورنىن نىعايتۋ ىسىندەگى ۆلاديمير پۋتيننىڭ ساياسي باعىتىنىڭ ماڭىزدى ءرولىن اتاپ ءوتتى.
«ۆلاديمير پۋتيننىڭ مىقتى ءارى بەدەلدى باسشىلىعىمەن رەسەي فەدەراتسياسى حالىقارالىق ارەنادا ءوزىن الەم ەلدەرى ساناساتىن جانە ونسىز بىردە-ءبىر ماڭىزدى حالىقارالىق پروبلەما شەشىلمەيتىن مەملەكەت رەتىندە تانىتتى»، - دەدى قاسىم-جومارت توقايەۆ.
ۆالەنتينا ماتۆيەنكو پرەزيدەنتكە كەزدەسۋگە مۇمكىندىك جاساعانى ءۇشىن شىنايى ريزاشىلىعىن ءبىلدىردى.
«ساپار الدىندا ۆلاديمير پۋتينمەن سويلەستىم. ول سىزگە جۇرەكجاردى سالەمىن جولدادى. سونداي-اق سىزدەردىڭ سەنىمدى ءارى شىنايى قارىم-قاتىناستارىڭىزدى جوعارى باعالايتىنىن ايتتى. قول جەتكىزىلگەن بارلىق ۋاعدالاستىقتاردىڭ جۇزەگە اسىرىلاتىنىن ناقتىلادى»، - دەدى فەدەراتسيا كەڭەسىنىڭ ءتوراعاسى.
بۇدان بولەك ۆالەنتينا ماتۆيەنكو ەلوردامىزدان العان اسەرىمەن ءبولىستى.
«كەزىندە ۆلاديمير پۋتين نۇر-سۇلتان قالاسىن قازىرگى زاماننىڭ عاجايىبى دەگەن ەدى. شىن مانىندە، قالا كوز الدىمىزدا كوركەيىپ كەلەدى. 6- شىلدەدە قالا كۇنىن اتاپ وتەتىندەرىڭىزدى بىلەمىن. ءسىزدى جانە نۇر-سۇلتان قالاسىنىڭ بارشا تۇرعىنىن كەلە جاتقان مەرەكەلەرىڭىزبەن قۇتتىقتايمىن»، - دەدى ۆالەنتينا ماتۆيەنكو.
سونىمەن قاتار ۆالەنتينا ماتۆيەنكو قاسىم-جومارت توقايەۆقا پارلامەنت سەناتىندا جانە ماجىلىستە وتكەن كەلىسسوزدەردىڭ قورىتىندىلارى تۋرالى ايتتى.
كەزدەسۋ سوڭىندا قاسىم-جومارت توقايەۆ رەسەيلىك ارىپتەسى ۆلاديمير پۋتينگە شىنايى ءىلتيپاتىن ءبىلدىرىپ، ىستىق سالەمىن جولدادى.
