مەملەكەت باسشىسى اۋىل اكىمدەرىن سايلاۋ ماسەلەلەرى جونىندە كەڭەس وتكىزدى
مەملەكەت باسشىسى وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرىمەن اۋىل اكىمدەرىن سايلاۋ ماسەلەلەرى جونىندە كەڭەس وتكىزدى. جيىنعا پرەزيدەنت اكىمشىلىگى مەن ۇكىمەتتىڭ باسشىلىق قۇرامى دا قاتىستى. پرەزيدەنت الداعى سايلاۋ ناۋقانىنىڭ ماڭىزدى ەكەنىن اتاپ ءوتتى.
«وسى وقيعانى ەلىمىزدىڭ تاريحىنداعى ايتۋلى بەلەس دەپ ايتۋعا بولادى. نەگىزى، بۇل ءبىز ءۇشىن ستراتەگيالىق ءمانى ايرىقشا مىندەت. ازاماتتارىمىز تۇڭعىش رەت جەرگىلىكتى اتقارۋشى بيلىكتىڭ باسشىسىن تىكەلەي سايلاۋ مۇمكىندىگىنە يە بولماق. ءبىز بۇعان بىرتىندەپ، جوسپارلى تۇردە كەلدىك»، - دەدى مەملەكەت باسشىسى.
قاسىم-جومارت توقايەۆ اۋىل اكىمدەرىن تىكەلەي سايلاۋ تۋرالى باستامانى بىلتىرعى جولداۋىندا كوتەرگەنىن ەسكە سالدى. ءبىر جىلعا جەتەر- جەتپەس ۋاقىت ىشىندە بۇل جۇمىس جۇزەگە اسىرىلا باستادى. مەملەكەت باسشىسى قازاقستان حالقىنىڭ 40 پايىزدان استامى اۋىلدا تۇراتىنىنا توقتالىپ، بۇل ساياسي شارا، ەڭ الدىمەن، اۋىل تۇرعىندارىنىڭ مۇددەسى ءۇشىن جاسالىپ جاتقانىن جەتكىزدى.
«الداعى سايلاۋ ءبىز جۇزەگە اسىرىپ جاتقان ساياسي رەفورمالارعا تىڭ سەرپىن بەرەدى دەپ سەنەمىن. سونداي- اق تۇرعىنداردى ەل باسقارۋ جانە شەشىم قابىلداۋ ۇدەرىسىنە تارتۋعا جول اشادى»، - دەدى قاسىم-جومارت توقايەۆ مەملەكەت باسشىسى پارتيالىق باسەكەنى كۇشەيتۋ ماسەلەسىنە نازار اۋداردى. پارتيادان ۇمىتكەر ۇسىنۋ مەملەكەتتىڭ ينستيتۋتسيونالدىق تۇتاستىعىن بەكەمدەي تۇسەدى جانە ساياسي ۇدەرىستىڭ بارىنشا اشىق بولۋىنا سەپتىگىن تيگىزەدى. وسى رەتتە قاسىم- جومارت توقايەۆ جەرگىلىكتى اتقارۋشى بيلىكتىڭ جاۋاپكەرشىلىگى جوعارى بولۋعا ءتيىس ەكەنىنە باسا ءمان بەردى.
«اكىمدەر - بيلىكتىڭ ءاربىر ەلدى مەكەندەگى تىكەلەي وكىلى. جۇرت ولاردىڭ قىزمەتىنە قاراپ بۇكىل مەملەكەتتىك باسقارۋ جۇيەسىنىڭ تيىمدىلىگىن باعالايدى. سوندىقتان ءتيىمدى مەملەكەت جانە ادىلەتتى قوعام تالاپتارىنا ساي بولۋ ءۇشىن الداعى سايلاۋدى دۇرىس ۇيىمداستىرۋ وتە ماڭىزدى»، - دەدى قاسىم-جومارت توقايەۆ.
سونىمەن قاتار پرەزيدەنت ءوڭىر باسشىلارىنا ءبىرقاتار مىندەت جۇكتەدى. اتاپ ايتقاندا مەملەكەت باسشىسى ەلىمىزدەگى سانيتارلىق- ەپيدەميولوگيالىق احۋالدىڭ ءالى دە كۇردەلى ەكەنىنە نازار اۋداردى. ونىڭ ايتۋىنشا، قازاقستاننىڭ جاسىل ايماقتا تۇرعانىنا قاراماستان، بوساڭسۋعا ءالى ەرتە، كوروناۆيرۋستىڭ ءۇندىستاندىق ءتۇرىنىڭ ءبىزدىڭ ەلىمىزدە دە بولۋى ىقتيمال. وسىعان بايلانىستى پرەزيدەنت سانيتارلىق- ەپيدەميولوگيالىق شەكتەۋلەردىڭ ءجيى بۇزىلىپ جاتقانىن جانە حالىقتى ۆاكسينالاۋ قارقىنىنىڭ باسەڭسىپ قالعانىن ايتتى.
«اكىمدەر ازاماتتارعا ەكپە سالۋ ناۋقانىنان شەتتەپ قالعان سياقتى. الەۋمەتتىك نىسانداردىڭ، بيزنەس كاسىپورىنداردىڭ جانە جالپى ەلدىڭ ەكونوميكاسى ۆاكتسينالاۋدىڭ ءساتتى جۇرگىزىلۋىنە تىكەلەي بايلانىستى ەكەنىن ءتۇسىنۋ كەرەك. قازىر جاپپاي ۆاكتسينالاۋ ناۋقانى اكىمدەر جۇمىسىنىڭ ەڭ ماڭىزدى مىندەتتەرىنىڭ قاتارىندا بولۋى قاجەت. سىزدەر بارىنشا بەلسەندىلىك تانىتىپ، ازاماتتاردى ۆاكتسينالاۋ ناۋقانىنا وزدەرىڭىز جەتەكشىلىك ەتۋلەرىڭىز كەرەك»، - دەدى پرەزيدەنت.
مەملەكەت باسشىسى سىبايلاس جەمقورلىققا قارسى الدىن الۋ جۇمىستارىن كۇشەيتۋگە شاقىردى. پرەزيدەنتتىڭ ايتۋىنشا، بىلتىر ءارتۇرلى دەڭگەيدەگى 7 اكىم مەن ولاردىڭ ورىنباسارلارى، سونداي- اق، 14 وبلىستىق باسقارما باسشىسى مەن ولاردىڭ ورىنباسارلارى قىلمىستىق جاۋاپكەرشىلىككە تارتىلعان.
بۇدان بولەك 2020 -جىلدىڭ قاڭتارىنان 2021 -جىلدىڭ ناۋرىزىنا دەيىنگى ارالىقتا قاراماعىنداعى قىزمەتكەرلەرىنىڭ جەمقورلىققا قاتىسى بولعانى ءۇشىن 20 ساياسي قىزمەتكەرگە قاتىستى شارا قولدانىلدى. قاسىم- جومارت توقايەۆ اكىمدەرگە ءوز ايماقتارىنداعى سىبايلاس جەمقورلىقتى بولدىرماۋ ءۇشىن جۇيەلى جۇمىستار جۇرگىزۋدى تاپسىردى. ال جەمقورلىققا قارسى كۇرەس قىزمەتى وزدەرىنە جۇكتەلگەن مىندەتكە سەرگەك قاراعانى ءجون.
«بۇعان دەيىن ايتقانىمداي، ەگەر مەملەكەتتىك قىزمەتشى بيۋدجەت قارجىسىن جىمقىرۋدى نەمەسە پارا الىپ بايۋدى كوزدەمەي، شەشىم قابىلداۋ كەزىندە قاتەلىككە جول بەرگەن بولسا، وندا ول قىلمىستىق جاۋاپكەرشىلىككە تارتىلماۋى كەرەك. ايتپەسە، مەملەكەتتىك اپپاراتتىڭ بەرەكەسىن كەتىرەمىز. سىبايلاس جەمقورلىققا سانالى تۇردە بارعان شەنەۋنىك قىلمىستىق جاۋاپكەرشىلىككە تارتىلۋى ءتيىس»، - دەدى پرەزيدەنت.
مەملەكەت باسشىسى وتكەن جىلىتۋ ماۋسىمى بارىسىندا بولعان وقىس وقيعالار، ءورت جانە تەحنولوگيالىق اپاتتار ماسەلەسىنە باسا ءمان بەردى. پرەزيدەنت توتەنشە جاعدايلاردىڭ سالدارىن جەدەل جويۋ جۇمىستارىن قامتاماسىز ەتۋ جونىندە تۇبەگەيلى شارالار قابىلداۋدىڭ قاجەتتىگىنە نازار اۋداردى. بۇدان بولەك قاسىم- جومارت توقايەۆ قوعامدىق مۇلىكتى ءبۇلدىرۋ، بۇزاقىلىق جانە ۆانداليزم سياقتى وقيعالاردىڭ جيىلەپ كەتكەنىنە توقتالدى.
«جۋىردا ەلوردادا ماس ادام ليفتىدەگى مونيتوردى سىندىرعانى ءۇشىن وعان 14 مىڭ تەڭگە عانا ايىپپۇل سالىنعان. بۇلاي بولمايدى. مۇنداي ءىس- ارەكەت ءۇشىن كەمىندە 15 تاۋلىككە قاماۋ كەرەك نەمەسە 1 جىلعا تۇزەتۋ جۇمىستارىنا سالۋ جونىندە جازا كەسۋ قاجەت. مۇنداي جاعدايلارعا مۇلدەم توزبەۋ كەرەك. جەڭىل جازا جارامايدى. ال ءىس جۇزىندە جازالاماۋ سالدارى قۇقىق بۇزۋشىلىق پەن قىلمىستىڭ ودان ءارى ورشۋىنە الىپ كەلەدى. سوندىقتان وسى ماسەلە بويىنشا زاڭنامانى قاتاڭداتۋ كەرەك»، - دەدى پرەزيدەنت.
مەملەكەت باسشىسى بيىل ءداستۇرلى فورماتتا وتەتىن جاڭا وقۋ جىلىنا دايىندىق جۇمىستارىن قازىردەن باستاپ قولعا الۋ قاجەت ەكەنىن ايتتى. ونىڭ ايتۋىنشا، كوپتەگەن ءبىلىم وردالارى ءبىر جىلدان استام ۋاقىت تولىققاندى جۇمىس ىستەمەدى. بۇل رەتتە، قاسىم-جومارت توقايەۆ ۋنيۆەرسيتەتتەردىڭ، مەكتەپتەر مەن بالاباقشالاردىڭ ينفراقۇرىلىمدارىنىڭ دايىندىعىن، سونىمەن قاتار وقىتۋشىلار مەن تاربيەشىلەر شتاتىنىڭ جاساقتالۋ دەڭگەيىن تەكسەرۋدى تاپسىردى. پرەزيدەنت جيىن سوڭىندا وڭىرلەردەگى احۋال ءۇشىن اكىمدەردىڭ وزدەرى جاۋاپ بەرەتىنىن ەسكە سالىپ، قوعامدىق- ساياسي تۇراقتىلىقتى جانە ورنىقتى دامۋدى قامتاماسىز ەتۋ ولاردىڭ تىكەلەي مىندەتى ەكەنىن اتاپ ءوتتى. ءىس- شارا بارىسىندا الماتى وبلىسىنىڭ اكىمى اماندىق باتالوۆ، تۇركىستان وبلىسىنىڭ اكىمى ءومىرزاق شوكەيەۆ، جامبىل وبلىسىنىڭ اكىمى بەردىبەك ساپاربايەۆ، اقتوبە وبلىسىنىڭ اكىمى وڭداسىن ورازالين جانە اقمولا وبلىسىنىڭ اكىمى ەرمەك مارجىقپايەۆ مەملەكەت باسشىسىنا اۋىل اكىمدەرىنىڭ الداعى سايلاۋىنا دايىندىق بارىسى جانە وڭىرلەردى دامىتۋ جونىندەگى تاپسىرمالارىنىڭ ورىندالۋى تۋرالى باياندادى.
