قازاقستاندا ۆاكسينا شىعاراتىن زاۋىت قاشان ىسكە قوسىلادى

نۇر-سۇلتان. قازاقپارات - جامبىل وبلىسىنداعى قازاقستاندىق ۆاكسينا وندىرەتىن زاۋىتتىڭ قاشان ىسكە قوسىلاتىنى بەلگىلى بولدى، دەپ حابارلايدى قازاقپارات ءتىلشىسى.

«بىزدە ۆاكسينا وندىرەتىن زاۋىت سالۋ تاجىريبەسى بولماعاندىقتان حالىقارالىق ۇيىمدارمەن بايلانىس ورناتىپ، اقش، قىتايدان قۇرال- جابدىقتارعا تاپىسىرىس بەردىك. پاندەميا كەزىندە سىرت ەلدەن تاۋار اكەلۋ وڭايعا سوقپايدى. ايتا كەتەيىن، كەيبىر كەرەك قۇرالداردى شانحايدان ءبىزدىڭ ەلشىلىك ارقىلى الدىردىق. بۇگىندە قاجەتتى قۇرال- جابدىقتىڭ 99 پايىزى ەلگە جەتكىزىلدى. ولاردى ورناتۋ جۇمىسىنا قىتاي، يتاليا جانە ۋكراينا ماماندارى جۇمىلدىرىلدى»، - دەدى جامبىل وبلىسىنىڭ اكىمى بەردىبەك ساپاربايەۆ و ك ق- دە وتكەن باسپا ءسوز ءماسليحاتىندا.

ونىڭ ايتۋىنشا، بۇگىن اتالعان زاۋىتتىڭ قۇرىلىس- مونتاجداۋ جۇمىسى اياقتالعان.

«كۇنى كەشە عانا تەحنيكالىق سىناق جاساپ كوردىك، ءبارى دۇرىس. قۇرال-جابدىقتى تولىقتاي ورناتىپ بولعان سوڭ تەحنولوگيالىق تۇرعىدان تەكسەرىستەن وتەدى. سودان سوڭ دەنساۋلىق ساقتاۋ جانە ءبىلىم جانە عىلىم مينيسترلىكتەرىنىڭ GMP تالاپتارىن راستايتىن سەرتيفيكات بەرىلەدى. ول ءۇشىن 1,5 اي ۋاقىت قاجەت. سەرتيفيكات العان سوڭ، ليتسەنزيا بەرىلۋى ءتيىس. وسىلايشا ۆاكسينا زاۋىتىن قىركۇيەك ايىندا ىسكە قوسۋ جوسپارلانىپ وتىر»، - دەيدى ول.

اۆتور: ءالي يبرايەۆ