ەلجان ءبىرتانوۆتىڭ ءۇيقاماقتا بولۋ مەرزىمى تاعى ءبىر ايعا ۇزارتىلدى

كەشە وتكەن وتىرىستا مەملەكەتتىك ايىپتاۋشى سوتتان بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ءۇيقاماقتا ۇستاۋ مەرزىمىن 14-شىلدەگە دەيىن ۇزارتۋدى سۇراعان بولاتىن.

پروكۋرور تولەگەن جاراسپايەۆ كۇدىكتى ەلجان ءبىرتانوۆتى ءۇيقاماقتا ۇستاۋ مەرزىمىن 9 ايعا دەيىن، ياعني 2021 -جىلعى 14- شىلدەگە دەيىن ۇزارتۋ تۋرالى ءوتىنىشتى قارجى مونيتورينگى اگەنتتىگى تەرگەۋ دەپارتامەنتىنىڭ باسشىسى تۇسىرگەنىن اتاي كەلىپ، قوسىمشا ساراپتاما مەن دەنساۋلىق ساقتاۋ مينيسترلىگىنىڭ قىزمەتكەرلەرىنەن الىنعان جاۋاپتاردى، مەملەكەتتىك اۋديت دەپارتامەنتىنىڭ قورىتىندىسىن تالداۋ جۇمىستارىن 14-ماۋسىمعا دەيىن اياقتاۋ مۇمكىن ەمەس دەگەن ءۋاج ايتتى. وسىنىڭ ءبارىن ەسكەرىپ، ءۇيقاماق مەرزىمىن 14-شىلدەگە دەيىن ۇزارتۋدى جانە قاناعاتتاندىرۋدى سۇرايمىن»، - دەدى مەملەكەتتىك ايىپتاۋشى.

سونداي- اق، ول ءبىرتانوۆقا وتباسى مۇشەلەرىنەن باسقا بارلىق ادامدارمەن تەلەفون ارقىلى سويلەسۋگە جانە ۇيدەن شىعۋعا تىيىم سالۋ كەرەكتىگىن ايتتى.

بۇل تالابىن ول تەرگەۋ جۇمىستارىنىڭ مەرزىمى 1-تامىزعا دەيىن ۇزارتىلۋىمەن بايلانىستىردى. پروكۋروردىڭ ايتۋىنشا، كۇدىكتى سوتتىڭ تىيىمى بار ەكەنىن بىلە تۇرىپ، ءبىرقاتار زاڭعا قايشى ارەكەتتەرگە بارعانىن اتادى. ءبىراق سوت وتىرىسىنا ب ا ق وكىلدەرى قاتىسىپ وتىرعانىن ەسكەرىپ، ناقتى قانداي ارەكەتتەر تۋرالى ءسوز بولىپ جاتقانىن اشىپ ايتا المايتىنىن جەتكىزدى. ونىڭ سوزىنشە، بۇل تەرگەۋ ارەكەتتەرىن جاريا ەتۋ بولماق. سوت پروتسەسى بارىسىندا قورعاۋشىلار ەلجان ءبىرتانوۆتىڭ سىرتىنان تەرگەۋ ورگانىنىڭ اڭدۋ جۇرگىزۋى زاڭدى ەكەنىن راستايتىن قۇجات جوق ەكەنىن ايتىپ، ءۇيقاماق مەرزىمىن ءارى قاراي ۇزارتپاۋدى سۇراعان بولاتىن. بۇگىن سوت ەلجان ءبىرتانوۆتى ءۇيقاماقتا ۇستاۋ مەرزىمىن 9 ايعا دەيىن، ياعني 2021 -جىلعى 14- ماۋسىمنان 14 -شىلدەگە دەيىن ۇزارتىلاتىنىن ءمالىم ەتتى.

«باياندالعان دەرەكتەردىڭ نەگىزىندە، قىلمىستىق ءىس جۇرگىزۋ ككودەكسىنىڭ 55، 56، 151، 152-باپتارىن باسشىلىققا الا وتىرىپ، سوت ەلجان امانتاي ۇلى ءبىرتانوۆقا قاتىستى ءۇيقاماق تۇرىندەگى بۇلتارتپاۋ شاراسىنىڭ مەرزىمىن 2021 -جىلعى 14-ماۋسىمنان باستاپ 14-شىلدەنى قوسا العاندا ەسەپتەلەتىن 9 ايعا دەيىن ۇزارتۋ تۋرالى قاۋلى ەتتى. كۇدىكتىنىڭ قورعاۋشىلارى مەن ادۆوكاتتارىنىڭ وتىنىشتەرى قاناعاتتاندىرۋسىز قالدىرىلسىن»، - دەدى تەرگەۋ سوتىنىڭ سۋدياسى اقمارال يسايەۆا ياعني، سوت ايىپتاۋشى تاراپتىڭ ءبىرتانوۆقا وتباسى مۇشەلەرىنەن باسقا بارلىق ادامدارمەن تەلەفون ارقىلى سويلەسۋگە جانە ۇيدەن شىعۋعا تىيىم سالۋ تۋرالى ءوتىنىشىن قابىلدامادى.

ءبىر اي بۇرىن سوت ەلجان ءبىرتانوۆتى ءۇيقاماقتا ۇستاۋ شاراسىن كۇشىندە قالدىرعان بولاتىن. ەسكە سالساق، بۇرىن دەنساۋلىق ساقتاۋ ءمينيسترى ەلجان ءبىرتانوۆ بيۋدجەت قاراجاتىن ىسىراپ ەتتى دەگەن كۇدىكپەن قاماۋعا الىنعان ەدى.