ءبىرجولعى زەينەتاقى تولەمىن پايدالانۋ ەرەجەسىنە جاڭا شەكتەۋ ەنگىزىلۋى مۇمكىن
مۇنداي ۇسىنىستى يندۋستريا جانە ينفراقۇرىلىمدىق دامۋ مينيسترلىگى ۇسىنىپ وتىر. تالقىلاۋعا شىعارىلعان قۇجاتتا ءبىرجولعى زەينەتاقى تولەمىن پايدالانىپ وتىرعان سالىمشى ءوز جۇبايى مەن ونىڭ جاقىن تۋىستارىنان جىلجىمايتىن مۇلىك ساتىپ الا المايتىنى جازىلعان.
«ءبىرجولعى زەينەتاقى تولەمدەرىن الۋشى مەن ءوتىنىش بەرۋشىنىڭ جۇبايىنان، جاقىن تۋىستارىنان، سونداي- اق جۇبايىنىڭ (زايىبىنىڭ) جاقىن تۋىستارىنان جىلجىمايتىن مۇلىك ساتىپ الۋعا پايدالانۋعا جول بەرىلمەيدى. وسى تارماقتىڭ ورىندالۋىن باقىلاۋ ماقساتىندا الۋشى جەكە كابينەتتە ءبىرجولعى زەينەتاقى تولەمىنە ەلەكتروندىق ءوتىنىش بەرگەن كەزدە اتالعان تۇلعالاردان جىلجىمايتىن مۇلىكتى ساتىپ الماۋ تۋرالى مىندەتتەمەگە قول قويادى»، - دەپ جازىلعان مينيستر بۇيرىعىنىڭ جوباسىندا.
قۇجاتتىڭ تولىق اتاۋى - «قازاقستان رەسپۋبليكاسىنىڭ زاڭناماسىنا سايكەس تۇرعىن ءۇي جاعدايلارىن جاقسارتۋ ءۇشىن ءبىرجولعى زەينەتاقى تولەمدەرىن پايدالانۋ قاعيدالارىن بەكىتۋ تۋرالى» قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2021 -جىلعى 21 قاڭتارداعى № 24 بۇيرىعىنا وزگەرىستەر مەن تولىقتىرۋلار ەنگىزۋ تۋرالى بۇيرىق».
مينيسترلىكتىڭ قۇجاتقا وسىنداي تۇزەتۋ دايىنداۋىنا نوتاريۋستار تاراپىنان تۇسكەن ساۋالدار سەبەپ بولعان كورىنەدى.
ۆەدومستۆوعا نەكە جاعىنان تۋىسقانداردىڭ اراسىنداعى باسپانا ساتۋ- ساتىپ الۋ كەلىسىمدەرىنە ءبىرجولعى زەينەتاقى تولەمدەرىن راسىمدەۋ قانشالىقتى زاڭدى ەكەنى تۋرالى ساۋالدار ءجيى تۇسەتىن بولعان.
