قاسىم-جومارت توقايەۆ وزبەكستاننىڭ پرەمەر-ءمينيسترىن قابىلدادى
قاسىم-جومارت توقايەۆ زاماناۋي سىن-قاتەرلەر كەزىندە تۇراقتىلىقتىڭ جوعارى دەڭگەيىن كورسەتكەن ەكىجاقتى ىنتىماقتاستىقتىڭ قازىرگى احۋالىنا وڭ باعاسىن بەردى.
پرەزيدەنتتىڭ پىكىرىنشە، بۇعان جوعارى دەڭگەيدەگى بەلسەندى ديالوگ، ۇكىمەتتەر اراسىنداعى تىعىز ىقپالداستىق، سونداي-اق، تاراپتاردىڭ ەكى ەل ورتاسىنداعى كوپقىرلى بايلانىستاردى نىعايتۋعا ۇمتىلىسى دالەل بولا الادى.
«ەكى مەملەكەت اراسىنداعى ىنتىماقتاستىق مەنىڭ وزبەكستانعا جاساعان ساپارىم كەزىندە قۇرمەتتى ارىپتەسىم شاۆكات ميرومون ۇلى ميرزيەيەۆپەن كەلىسسوزدەر بارىسىندا قول جەتكىزىلگەن ۋاعدالاستىقتارعا سايكەس جوعارى دەڭگەيدە ءارى تابىستى دامىپ كەلەدى. ءبىز باۋىرلاس وزبەكستانمەن ىقپالداستىقتى دامىتۋعا باسا ءمان بەرەمىز. ويتكەنى مۇنى ورتالىق ازياداعى تۇراقتىلىق پەن قاۋىپسىزدىكتى ساقتاۋدىڭ ماڭىزدى فاكتور دەپ سانايمىز. ەكى ەل اراسىنداعى ىنتىماقتاستىقتى ءارتۇرلى باعىتتا، ەڭ باستىسى، مازمۇندىق تۇرعىدان ىلگەرىلەتەتىن بىرلەسكەن ءبىرقاتار جوبالاردىڭ بار ەكەنىن اتاپ وتكىم كەلەدى»، - دەدى قازاقستان پرەزيدەنتى.
مەملەكەت باسشىسى بۇگىندە وزبەكستاننىڭ كوپتەگەن سالالار بويىنشا تابىستى دامىپ، وندا جوسپارلى تۇردە ۇلكەن رەفورمالاردىڭ جۇرگىزىلىپ جاتقانىن ءمالىم ەتتى. پرەزيدەنتتىڭ سوزىنشە، قازاقستاندىقتار ستراتەگيالىق ارىپتەسىمىز ءارى وداقتاسىمىز وزبەكستاننىڭ جەتىستىكتەرىنە شىن نيەتىمەن قۋانادى.
«وزبەكستان شاۆكات ميرومون ۇلى ميرزيەيەۆتىڭ باسشىلىعىمەن الەۋمەتتىك-ەكونوميكالىق دامۋ بويىنشا ايتارلىقتاي جەتىستىكتەرگە قول جەتكىزدى. باۋىرلاس ەل بولعاندىقتان ءبىز بۇعان قۋانىشتىمىز. ارينە وزبەكستاننىڭ تابىستى دامۋى ءوزارا ءتيىمدى ىنتىماقتاستىقتى وركەندەتۋگە وڭ ىقپال ەتەدى»، - دەدى قاسىم-جومارت توقايەۆ.
ابدۋللا اريپوۆ ءوز كەزەگىندە كەزدەسۋگە مۇمكىندىك تۋعىزعانى ءۇشىن قاسىم-جومارت توقايەۆقا العىس ايتىپ، وزبەكستان پرەزيدەنتى شاۆكات ميرزيەيەۆتىڭ جۇرەكجاردى سالەمى مەن ىزگى نيەتىن جەتكىزدى.
«شاۆكات ميرومون ۇلى مەن ءسىزدىڭ، قاسىم-جومارت كەمەل ۇلى تۇراقتى ءارى ءوزارا سەنىمگە نەگىزدەلگەن قارىم-قاتىناستارىڭىزدىڭ ارقاسىندا كوپجاقتى قازاق-وزبەك ىنتىماقتاستىعىنىڭ وڭ قارقىنى ءساتتى قالىپتاستى. الداعى جىلدارى ءوزارا ساۋدا-ساتتىق كولەمىن 10 ميلليارد دوللارعا جەتكىزۋ مىندەتىن جۇكتەدىڭىزدەر. ەكى ەل ۇكىمەتتەرى وسى مەجەگە ناقتى قول جەتكىزۋدى كوزدەيدى»، - دەدى ابدۋللا اريپوۆ.
مەملەكەت باسشىسى ۇكىمەتتەردىڭ جۇمىس قارقىنىن باسەڭدەتۋگە بولمايتىنىن اتاپ ءوتىپ، كوروناۆيرۋس كەزەڭىنەن كەيىنگى ەكى ەل اراسىنداعى ساۋدا-ەكونوميكالىق ىقپالداستىقتى ارتتىرۋ ءۇشىن بارلىق الەۋەتتى جۇمىلدىرۋدىڭ ماڭىزدى ەكەنىنە نازار اۋداردى.
قاسىم-جومارت توقايەۆ شاۆكات ميرزيەيەۆپەن تەلەفون ارقىلى سويلەسۋ بارىسىندا وزبەكستان پرەزيدەنتىنىڭ وزىنە ىڭعايلى ۋاقىتتا قازاقستانعا مەملەكەتتىك ساپارىن ۇيىمداستىرۋ جونىندە ۋاعدالاسقانىن ايتتى.
كەزدەسۋ سوڭىندا قازاقستان پرەزيدەنتى وزبەكستاننىڭ پرەمەر-ءمينيسترى ابدۋللا ءاريپوۆتى قازاق-وزبەك بايلانىستارىن دامىتۋعا جانە دوستىق ارقاۋىن نىعايتۋعا قوسقان ۇلەسى ءۇشىن Ⅱ دارەجەلى دوستىق وردەنىمەن ماراپاتتادى.
