قازاقستانداعى ەڭ تابىستى اقىلى جول قانداي

نۇر- سۇلتان. قازاقپارات - يدۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ اقىلى جولداردىڭ قايسىنان قانشا تابىس كەلىپ جاتقانى تۋرالى ايتتى، دەپ حابارلايدى قازاقپارات ءتىلشىسى.

«بىزدەگى 4 اقىلى جولدىڭ جالپى ۇزىندىعى - 680 شاقىرىم. نۇر- سۇلتان - شۋچينسك، نۇر- سۇلتان - تەمىرتاۋ، الماتى - قاپشاعاي جانە الماتى - قورعاس جولدارىنان تۇسەتىن جالپى تابىس - 5,7 ميلليارد تەڭگە بولدى. ەڭ تابىستى جول - ەڭ قىسقاسى بولسا دا، الماتى- قاپشاعاي ۋچاسكەسى. بۇل بولىكتەن 1,6 ميلليارد تەڭگەدەي تابىس كەلەدى. ونىڭ ءبىر بولىگىن «قازاۆتوجول» باسقا اقىلى ۋچاسكەلەرگە باعىتتادى. ويتكەنى تەمىرتاۋ مەن شۋچيسنككە استانادان قاتىنايتىن جولدار وتە كۇردەلى. قىستا جيى قار الادى. شۋچينسك جولىنىڭ تابىسى دا 1,6 ميلليارد تەڭگە بولادى. تەمىرتاۋ مەن قورعاۋ ۋچاكەسىنىڭ كىرىسى شامامەن 1,1 ميلليارد تەڭگە»، - دەدى ول حالىق الدىنداعى ەسەپتىك كەزدەسۋىنەن كەيىن وتكەن بريفينگىدە.

بەيبىت اتامقۇلوۆ اقىلى جولدىڭ تابىستىلىعى قوزعالىستىڭ جيىلىگىنە جانە وتەتىن كولىكتەردىڭ تيپىنە بايلانىستى ەكەنىن ەسكەرتتى. سونداي- اق، ول قازاقستاننىڭ اقىلى جولدارىندا نەگە ەۋروپاداعىداي سەرۆيس جوق ەكەنىن ءتۇسىندىردى.

«بىزدەگى اقىلى جولدار مەن ەۋروپانى سالىستىرىپ جاتادى. ەۋروپاداعى تىعىزدىقتى قاراڭىزدار. جولداردىڭ كىرىسى وتە جوعارى. ويتكەنى كولىك اعىنى وتە تىعىز. ال بىزدە 500 شاقىرىمدىق جولدىڭ بويىنشا بىرنەشە شاعىن ەلدى مەكەن عانا ورنالاسقان. سەرۆيس ماسەلەسى دە وسىعان بايلانىستى. بىزدە جولداردى كۇتىپ ۇستاۋ وتە قيىن. قىستا قار العاندا تەحنيكا ونداعان شاقىرىم جەردەن باراتىن كەزدەر بولادى. كليماتىمىز دا، تىعىزدىعىمىز دا ءار ءتۇرلى. جولدارىمىز وتە ۇزىن، ال حالىقتىڭ سانى از. كولىك سانى بويىنشا دا كوپتەگەن ەلدەرمەن تەڭدەسە المايمىز. بۇل كورسەتكىش جولدىڭ تابىستىلىعىنا وتە قاتتى اسەر ەتەدى. حالقى مەن كولىك سانى تىعىز ەلدەردە جولدىڭ شىعىنى تەز اقتالادى. ونداعى باعا دا مۇلدە باسقاشا»، - دەدى مينيستر.

اۆتور: ەسىمجان ناقتىباي