مينيستر سىرتقى نەسيە ەسەبىنەن ىسكە اسىپ جاتقان جوبالاردى اتادى

نۇر- سۇلتان. قازاقپارات - حالىق الدىندا ەسەپ بەرگەن يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ حالىقارالىق قارجى ينستيتۋتتارىنىڭ اقشاسىنا جوندەلىپ جاتقان جولداردىڭ جاعدايىنا توقتالدى، دەپ حابارلايدى قازاقپارات ءتىلشىسى.

«بۇگىندە قاراعاندىدان قاپشاعايعا (946 ك م) دەيىنگى ۋچاسكەلەردە اۋقىمدى قۇرىلىس ءجۇرىپ جاتىر. ەلىمىزدىڭ شىعىسىندا «تالدىقورعان- وسكەمەن» (768 ك م) جانە «قالباتاۋ- مايقاپشاعاي» (415 ك م) جولدارى قايتا جاڭعىرتۋدان وتۋدە. الاكولدىڭ تۋريستىك كلاستەرىن دامىتۋ ءۇشىن ءبىز «ءۇشارال- دوستىق» (184 ك م) اۆتوجولىن قايتا جاڭارتىپ جاتىرمىز»، - دەگەن ۆەدومستۆو باسشىسى «مەركى- بۋرىلبايتال» (262 ك م) تاسجولىن قايتا جاڭارتۋ ارقىلى بالقاش كولىنىڭ كۋرورتتىق ايماعىن ساپالى ينفراقۇرىلىممەن قامتاماسىز ەتۋ كوزدەلگەنىن ەسكە سالدى.

«وڭتۇستىكتەگى «ۇزىناعاش- وتار» (96 ك م) اۆتوجولى قايتا جاڭعىرتىلىپ، شامالعان ستانسياسىنىڭ تەمىرجول وتكەلىنە جول ايرىعى سالىنۋدا. باتىستاعى «اقتوبە- اتىراۋ- استراحان» (740 ك م) جوباسىن جۇزەگە اسىرىپ جاتىرمىز. وسى ماقساتتارعا حالىقارالىق قارجى ينستيتۋتتارىنىڭ قارىزدارى تارتىلعان. ولاردىڭ قاتارىندا دۇنيەجۇزىلىك، ەۋروپالىق قايتا قۇرۋ جانە دامۋ بانكى، ازيا دامۋ بانكى جانە «ەكسيم بانك» نەسيەلەرى بار»، - دەدى بەيبىت اتامقۇلوۆ.

ءمينيستردىڭ ايتۋىنشا، اتالعان جوبالاردان قيىندىقتار تاۋىنداپ جاتقان كورىنەدى. اتاپ ايتقاندا، ەۋروپا قايتا قۇرۋ جانە دامۋ بانكى قارجىلاندىراتىن «بالقاش- بۋرىلبايتال» (288 ك م) جانە «ۇزىناعاش- وتار» (96 ك م) جوبالارىندا جۇمىستاردى ساپاسىز ورىنداعان مەردىگەرلىك ۇيىمدارمەن 4 كەلىسىمشارت توقتاتىلعان.

«قالعان 2 ۋچاسكە بويىنشا بانك ەرەجەلەرى بويىنشا مەردىگەر ۇيىمدى انىقتاۋ بويىنشا كونكۋرستىق راسىمدەر وتكىزىلەدى. جالپى، مەملەكەت باسشىسى تاپسىرعانداي، قاراعاندى- بالقاش- الماتى ءدالىزى 2023 -جىلى تولىعىمەن اياقتالادى»، - دەپ سەندىردى مينيستر.

بەيبىت اتامقۇلوۆ «ەكسيم بانكتىڭ» قارجىلاندىراتىن «مەركە- بۋرىلبايتال» جانە «قالباتاۋ- مايقاپشاعاي» جوبالارى بويىنشا «سينسين» جانە «قازگەرستروي» كومپانيالارى قيىندىققا تاپ بولعانىن اتادى.

«اتالعان جوبالاردى ىسكە اسىرۋعا تەڭگەنىڭ قۇنسىزدانۋى مەن قۇبىلمالىلىعى اسەر ەتتى. بيتۋم، سەمەنت، مەتالل، ديزەل باعاسىنىڭ تۇراقتى ءوسۋى دە اسەر ەتۋدە»، - دەدى يندۋستريا جانە ينفراقۇرىلىمدىق دامۋ ءمينيسترى.

اۆتور: ەسىمجان ناقتىباي