اۋىل ماڭىنداعى جايىلىم تاپشىلىعى قالاي شەشىلەدى

نۇر- سۇلتان. قازاقپارات - ءماجىلىستىڭ جالپى وتىرىسىندا ق ر اۋىل شارۋاشىلىعى ءبىرىنشى ۆيتسە- ءمينيسترى ايداربەك ساپاروۆ اۋىل ماڭىنداعى جايىلىم تاپشىعى ماسەلەسى قالاي شەشىلەتىنىن ايتتى، دەپ حابارلايدى قازاقپارات ءتىلشىسى.

ايتا كەتەيىك ، بۇگىن پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

«قازىرگى زاڭ جوباسىندا اۋىلدىڭ ماڭىنداعى جايىلىم جەرلەر اۋىلدىڭ مالىن باعۋ ءۇشىن بولىنەتىن بولادى. ءبىراق مالدىڭ سانىنا بايلانىستى شەكاراسى بەلگىلەنەدى. ەگەر ول جەر بۇرىن بىرەۋگە جەكەمەنشىككە بەرىلسە، وندا ونى باعالاۋ جۇرگىزىلەدى. سودان قايتا ساتىپ الىنادى. سونداي- اق بۇل جەر جالدا بولسا، وندا ءدال وسىنداي القاپتاعى جەر باسقا ەگىستىكتەن بەرىلەدى. ينفراقۇرىلىمدىق شىعىندار تىركەلسە (قۇدىق نەمەسە باسقا نىساندار)، بۇنىڭ بارلىعى باعالانىپ، شىعىنى قايتارىلادى. مەنىڭ ويىمشا، بۇل جاقسى شەشىم بولادى. بۇگىندە مال باعاتىن جەر پروبلەما ەكەنى بەلگىلى»، - دەدى ءبىرىنشى ۆيتسە- مينيستر ءماجىلىستىڭ جالپى وتىرىسىندا.

زاڭ جوباسىنىڭ نەگىزگى وزگەرىستەرى مەن تولىقتىرۋلارى:

- قازاقستاندىقتارعا جانە قازاقستاندىق زاڭدى تۇلعالارعا اۋىل شارۋاشىلىعى ماقساتىنداعى جەرلەردى 49 جىلعا دەيىنگى مەرزىمگە جالعا بەرۋ؛

- جەر رەسۋرستارىن باسقارۋ كوميتەتىنە جەردى پايدالانۋ مەن قورعاۋدى مەملەكەتتىك باقىلاۋ فۋنكتسيالارىن اكىمدىكتەردەن قايتارۋ؛

- اۋىل شارۋاشىلىعى جەرلەرىنىڭ نىسانالى ماقساتىن «باعباندىق» جانە «ساياجاي قۇرىلىسىنا» وزگەرتۋگە تىيىم سالۋ؛

- حالىقتىڭ مۇقتاجىن قاناعاتتاندىرۋ ماقساتىندا، جەرگىلىكتى جاعدايلاردى ەسكەرە وتىرىپ، جايىلىمداردى باسقارۋ جونىندەگى جوسپارلاردا، قاجەتتى جايىلىم القابىنىڭ شەكاراسىن ايقىنداۋ؛

- اۋىل شارۋاشىلىعى ماقساتىنداعى جەرلەردى جەكە مەنشىككە بەرۋگە ءموراتورييدىڭ قولدانىلۋ مەرزىمىن 2026 -جىلعى 31 -جەلتوقسانعا دەيىن ۇزارتۋ.

اۆتور: رۋسلان عابباسوۆ