بەيبىت اتامقۇلوۆ: اقىلى جولدارعا جاڭا تاريف ءالى ەنگىزىلمەيدى
يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ حالىق الدىنداعى ەسەبى كەزىندە وسنىداي مالىمەت ايتتى، دەپ حابارلايدى قازاقپارات ءتىلشىسى.
«تاريفكە كەلەتىن بولساق، قازاق جول عىلىمي- زەرتتەۋ ينستيتۋتىنىڭ ماماندارى اۋىر جۇك كولىكتەرى ءۇشىن «38» دەگەن سان ۇسىنعان بولاتىن. ءبىراق مينيسترلىك پەن سالالىق ۆەدومستۆو بۇل تاريفتى بەكىتكەن جوق. قازىر 2013 -جىلعى تاريف قولدانىلىپ وتىر. اقىلى نەگىز بىرتىندەپ اقاۋسىز ۋچاسكەلەرگە عانا ەنگىزىلەدى»، - دەدى مينيستر.
سونداي- اق ول تولەماقى ستاۆكالارى جاڭا ۋچاسكەلەردە دە ساقتالاتىنىن ەسكەرتتى.
«كورشى ەلدەردە اقىلى جۇيە تالايدان بەرى بار. ونداعى تاريفتىك مولشەرلەمەلەر قازاقستانمەن سالىستىرعاندا الدەقايدا جوعارى. سالىستىرىپ قاراساق، رەسەيدە جۇك ماشينالارى 1 ك م ءۇشىن 22 تەڭگە تولەيدى، يتاليا مەن گەرمانيادا - ورتا ەسەپپەن 70 تەڭگە، بەلارۋستە - 80 تەڭگە تولەيدى، ال حورۆاتيادا جۇك كولىگى ءۇشىن جولدا ءجۇرۋ 122 تەڭگە تۇرادى»، - دەدى بەيبىت اتامقۇلوۆ.
مينيسترلىكتىڭ رەسمي دەرەگى بويىنشا، قازىر ەلىمىزدىڭ اقىلى جولدارىندا تاريف جەڭىل اۆتوموبيل ءۇشىن 1 شاقىرىمعا - 1 تەڭگە. ال اۆتوبۋستار ءۇشىن وتىرعىزۋ ورىندارىنىڭ سانىنا بايلانىستى ءبىر شاقىرىمعا 5-تەن 15 تەڭگەگە دەيىن قۇبىلادى. اۋىر جۇك كولىك يەلەرى ءبىر شاقىرىمعا 5 تەڭگەدەن 25 تەڭگەگە دەيىن تولەيدى.
اۆتور: ەسىمجان ناقتىباي
