مەملەكەت باسشىسى جاقىپ اسانوۆقا دەربەس سوت تورەلىگى تەتىكتەرىن ەنگىزۋدىڭ ماڭىزىن ايتتى

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ جوعارعى سوت ءتوراعاسى جاقىپ اسانوۆتى قابىلدادى، دەپ حابارلايدى اقوردا.

پرەزيدەنتكە سوت جۇيەسىن رەفورمالاۋ بارىسى تۋرالى اقپارات بەرىلدى.

جاقىپ اسانوۆ پرەزيدەنتكە «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» كونستيتۋتسيالىق زاڭعا بيىل ەنگىزىلگەن وزگەرتۋلەردىڭ قۇقىقتىق جانە الەۋمەتتىك اسەرى جايىندا باياندادى.

جوعارعى سوت ءتوراعاسى جاڭا ازاماتتىق پروتسەسسۋالدىق جانە اكىمشىلىك راسىمدىك-پروتسەسسۋالدىق كودەكستەردىڭ ەلىمىزدەگى ينۆەستيتسيالىق احۋال مەن بيزنەستىڭ دامۋىنا وڭ ىقپال ەتەتىنىن اتاپ ءوتتى.

ونىڭ ايتۋىنشا، ەنگىزىلگەن تۇزەتۋلەر تۇراقتى ءارى ءبىرىڭعاي سوت تاجىريبەسىن قامتاماسىز ەتەدى.

كەزدەسۋ قورىتىندىسى بويىنشا قاسىم-جومارت توقايەۆ دەربەس سوت تورەلىگىنىڭ ءتيىمدى تەتىكتەرىن ەنگىزۋدى، ونىڭ ىشىندە، شەتەلدىك وزىق تاجىريبەلەردى پايدالانا وتىرىپ قامتاماسىز ەتۋدىڭ ماڭىزدى ەكەنىن ايتتى.