پاۆلودار- سەمەي ۋچاسكەسى جۇك كولىكتەر ءۇشىن اقىلى بولادى
مەملەكەتتىك باعدارلامانى جۇزەگە اسىرۋ جوسپارىنىڭ نەگىزىندە، قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى مەن «QazAvtoJol» ۇ ك» ا ق بىرلەسىپ تولەم الۋدىڭ «اشىق جۇيەسىن» ەنگىزۋ تۋرالى شەشىم قابىلدادى، دەپ حابارلايدى قازاقپارات «QazAvtoJol» ۇ ك» ا ق باسپا ءسوز قىزمەتىنە سىلتەمە جاساپ.
جۇيەنىڭ ەرەكشەلىگى - ۋچاسكەلەردە شلاگباۋمدار بولمايدى. اۆتوكولىكتەردىڭ ءجۇرىپ وتكەن جولى تۋرالى اقپارات اركالاردا ورنالاسقان ارنايى كامەرالار ارقىلى تىركەلەدى. پاۆلودار - سەمەي ۋچاسكەسى Ⅱ تەحنيكالىق ساناتتاعى اۆتوجول بولعاندىقتان، تەك جۇك كولىكتەردەن عانا تولەم الىناتىن بولادى. اقىلى ۋچاسكە بويىنشا جول اقىسىن ەكىنشى دەڭگەيدەگى بانكتەر (كاسپي، حوۋمبانك جانە ت. ب. سياقتى ينتەرنەت- بانكينگ قوسىمشالارىن قوسا ساناعاندا)، تولەم تەرمينالدارى (Qiwi, woopay)، سونداي- اق كسەلل، اكتيۆ، بيلاين موبيلدى بايلانىس وپەراتورلارىمەن SSID كود جىبەرۋ ارقىلى تولەۋگە بولادى.
جالپى اۆتوكولىكتىڭ جەكە شوتىن تولتىرۋدىڭ 20-دان استام ءتاسىلى بار. سونداي- اق، جۇرگىزۋشىلەر مەن جولاۋشىلاردىڭ قولايلىعى ءۇشىن ماماندار كاج موبايل اتتى موبيلدىك قوسىمشانى جاساپ شىعاردى. بۇگىندە، بۇل قوسىمشا ارقىلى جەكە شوتتاعى قاراجاتتى، ءجۇرىپ وتكەن جول تۋرالى اقپاراتتى بىلۋگە بولادى. كەرى بايلانىس تا بار. الداعى ۋاقىتتا ا پۋنكتىنەن ب پۋنكتىنە دەيىنگى مارشرۋتتى ەسەپتەۋ (ۇزىندىعى مەن باعاسى) جول بويىنداعى بارلىق سەرۆيس نىساندارى كورسەتىلگەن ينتەراكتيۆتى كارتا مەن PUSH حابارلاندىرۋلار دا ىسكە قوسىلادى.
اقىلى ۋچاسكەگە قاتىستى بارلىق ماسەلەلەر بويىنشا پايدالى اقپارات بەرۋ ءۇشىن سەمەي قالاسىنىڭ شىعابەرىسىندە كليەنتتەرمەن جۇمىس ىستەۋ ورتالىعى ىسكە قوسىلادى. سونداي- اق، 1403 نومىرىندەگى بايلانىس ورتالىعىنا دا حابارلاسۋعا بولادى.
