پرەزيدەنتكە قازاقستانداعى ۇجىمداستىرۋدىڭ قاسىرەتتى تاريحىن باياندايتىن ءۇش تومدىق ۇسىنىلدى

نۇر-سۇلتان. قازاقپارات - مەملەكەت باسشىسى پارلامەنت سەناتىنىڭ ءتوراعاسى ماۋلەن اشىمبايەۆتى قابىلدادى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

كەزدەسۋدە ەل پرەزيدەنتىنىڭ تاپسىرمالارىن زاڭنامالىق تۇرعىدان قامتاماسىز ەتۋ ماسەلەلەرى قاراستىرىلدى.

سەنات ءتوراعاسى مەملەكەت باسشىسى قاسىم-جومارت توقايەۆقا قابىلدانعان ءبىرقاتار زاڭدار جونىندە، سونىڭ ىشىندە، رەسپۋبليكالىق بيۋجەت تۋرالى زاڭعا ەنگىزىلگەن وزگەرتۋلەر مەن تولىقتىرۋلار، سايلاۋ تۋرالى زاڭعا ەنگىزىلگەن تۇزەتۋلەر تۋرالى ايتتى.

مەملەكەت باسشىسى اتالعان زاڭدارعا قول قويدى. جوعارعى پالاتا كۆازيمەملەكەتتىك سەكتورداعى ساتىپ الۋلاردى رەتتەيتىن زاڭ قابىلدادى.

قازىرگى ۋاقىتتا الەۋمەتتىك كاسىپكەرلىكتى دامىتۋ، سالىق كودەكسىنە وزگەرتۋلەر مەن تولىقتىرۋلار ەنگىزۋ جانە باسقا دا زاڭ جوبالارى دەپۋتاتتاردىڭ قاراۋىندا جاتىر. ماۋلەن اشىمبايەۆتىڭ مالىمەتى بويىنشا وسى سەسسيا باستالعالى بەرى سەناتورلار 12 زاڭ جوباسىنا باستاماشى بولدى.

ونىڭ 3 ءىن پارلامەنت قابىلداسا، 4 ءۋى سەنات پەن ءماجىلىستىڭ قاراۋىندا. تاعى 5 زاڭ جوباسى دەپۋتاتتاردىڭ باستاماسىمەن ازىرلەنىپ جاتىر.

سەنات ءتوراعاسى پرەزيدەنتكە پارلامەنتارالىق ىنتىماقتاستىقتى دامىتۋ، رەسەي، وزبەكستان جانە باسقا دا ەلدەردىڭ زاڭ شىعارۋشى ورگاندارىمەن بايلانىستاردى نىعايتۋ جونىندە ايتتى. سونىمەن قاتار ماۋلەن اشىمبايەۆ مەملەكەت باسشىسىنىڭ تاپسىرماسى بويىنشا ازىرلەنگەن «اشارشىلىق. گولود. 1928-1934. دەرەكتى حرونيكا» جيناعىن ۇسىندى.

اتالعان ءۇش تومدىقتا قازاقستانداعى كۇشتەپ ۇجىمداستىرۋدىڭ قاسىرەتتى تاريحىن باياندايتىن مىڭنان استام ارحيۆ قۇجاتتارى جيناقتالعان.