ءۇندىستان قازاقستان جىبەرگەن گۋمانيتارلىق كومەكتى جوعارى باعالادى
وسىعان بايلانىستى، ءبىرقاتار ءۇندى كومپانيالارىنىڭ باسشىلىعى قازاقستاننىڭ نيۋ- دەليدەگى ەلشىلىگىنە ءوز حاتتارىن جولداپ، بۇكىل الەم ءۇشىن وسىنداي قيىن ۋاقىتتا ىنتىماقتاستىق پەن قولداۋ كورسەتكەنى ءۇشىن شىنايى ريزاشىلىعىن ءبىلدىردى.
«2021 -جىلعى 13 جانە 14 - مامىردا قازاقستاننان جەتكىزىلگەن مەديتسينالىق كومەك كوپتەگەن ادامداردىڭ ءومىرىن ساقتاپ قالۋعا كومەكتەسەتىنى ءسوزسىز. ۇندىستەر بۇل اسىل يشاراتتى ءارقاشان ەستە ساقتايدى» دەپ كورسەتىلگەن حاتتا.
بۇدان بۇرىن حابارلانعانداي، نيۋ- دەلي اۋەجايىنا جالپى سالماعى 40 تونناعا جۋىق گۋمانيتارلىق كومەك جۇگى بار ەكى قازاقستاندىق اۋە كەمەسى كەلدى. وندا دەنساۋلىق ساقتاۋ سالاسىنداعى قازاقستاندىق ءوندىرۋشى كومپانيالاردىڭ مەديتسينالىق ماسكا، رەسپيراتور، قورعانىس كوستيۋمى جانە وكپەنى جاساندى جەلدەتۋدىڭ پورتاتيۆتى اپپاراتتارى بار.
ەستەرىڭىزگە سالا كەتەيىك، 2021 -جىلعى 4 -مامىردا قازاقستان پرەزيدەنتى قاسىم- جومارت توقايەۆ ءۇندىستان پرەمەر- ءمينيسترى نارەندرا موديگە جولداۋ جىبەرگەن، وندا «ءۇندىستاندا COVID-19 ىندەتىنىڭ قاتتى ورشۋىنە بايلانىستى قالىپتاسقان قيىن- قىستاۋ كەزەڭدە ءۇندى ەلىنىڭ قايعى- قاسىرەتىنە ورتاق ەكەنىن جەتكىزگەن» بولاتىن. ال 7- مامىردا قازاقستان ۇكىمەتىنە ءۇندى تاراپىنا ءتيىستى كومەك كورسەتۋدى تاپسىردى. قازاقستان مەن ءۇندىستاندى ەكى ەل حالىقتارى اراسىنداعى ءداستۇرلى دوستىق پەن ءوزارا جاناشىرلىق رۋحىندا ستراتەگيالىق ارىپتەستىك قاتىناستار بىرىكتىرەتىنىن اتاپ وتكەن ءجون.
