اسقار مامين ۆاكسينالاۋ قارقىنىن ارتتىرۋدى تاپسىردى

نۇر- سۇلتان. قازاقپارات - ۆاكسينانىڭ بولۋ- بولماۋى بويىنشا ەشقانداي پروبلەما جوق. بۇل تۋرالى ۇكىمەت وتىرىسىندا ق ر پرەمەر- ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«ۆيرۋستىڭ رەپرودۋكتيۆتىلىك يندەكسى 0,95 قۇرايدى. اۋرۋحانالارداعى توسەك- ورىندار – 33، جان ساقتاۋ بولىمدەرى 26 پايىزعا تولى. دەگەنمەن 6 ءوڭىر «قىزىل ايماقتا» : نۇر- سۇلتان، الماتى، باتىس قازاقستان، اقمولا، قاراعاندى، اتىراۋ وبلىستارى. بۇگىنگى تاڭدا كوروناۆيرۋسقا قارسى شامامەن 3 ميلليون ەكپە جاسالدى. سونىڭ ىشىندە، العاشقى كومپونەنتپەن 2 ميلليوننان استام، ەكىنشى كومپونەنتپەن 1 ميلليونعا جۋىق ادام ۆاكسينا الدى»، - دەدى ۇكىمەت باسشىسى.

ونىڭ اتاپ وتۋىنشە، ۆاكسينا قورلارىن تولتىرۋ، ەگۋ پۋنكتتەرىنىڭ سانىن ارتتىرۋ بويىنشا شارالار قابىلدانىپ جاتىر. ۆاكسينانىڭ بولۋ- بولماۋى بويىنشا ەشقانداي پروبلەما جوق.

«قازىر ەگۋ ناۋقانىن كەڭەيتۋ پاندەميامەن كۇرەسۋدە ەڭ ماڭىزدى مىندەت بولىپ تابىلادى. دەنساۋلىق ساقتاۋ مينيسترلىگى مەن اكىمدىكتەرگە ۆاكسينالاۋ قارقىنىن ارتتىرۋدى تاپسىرامىن»، - دەدى اسقار مامين.