قاسىم-جومارت توقايەۆ پرەمەر-ءمينيستردىڭ ورىنباسارى ەرالى توعجانوۆتى قابىلدادى
ەرالى توعجانوۆ پرەزيدەنتكە ەلىمىزدەگى ەپيدەميولوگيالىق احۋالدى تۇراقتاندىرۋ جونىندە ايتتى.
بيىلعى 1- مامىردان باستاپ كوروناۆيرۋس ىندەتىن جۇقتىرعانداردىڭ سانى 0,9 پايىزدان 0,49 پايىزعا تومەندەگەن. اۋرۋحاناعا تۇسكەن ادامدار 41 پايىزدان 34 پايىزعا ازايعان. سونىمەن قاتار ەلىمىزگە COVID-19 ىندەتىنە قارسى ۆاكسينانىڭ 2,3 ميلليون دوزاسى جەتكىزىلگەنى ايتىلدى.
مامىر ايىنىڭ سوڭىنا دەيىن قوسىمشا 2 ميلليون دوزا ەكپە جەتكىزۋ جوسپارلانۋدا. شىلدە ايىنان باستاپ وتاندىق «QazVac» ۆاكسيناسىن ءوندىرۋ 500 مىڭ دوزاعا دەيىن ۇلعايادى. پرەمەر- ءمينيستردىڭ ورىنباسارى مەملەكەت باسشىسىنا «Ashyq» جوباسىنىڭ ەنگىزىلۋى جايىندا مالىمەت بەردى. بۇگىندە 1,5 ميلليون قازاقستاندىق اتالعان قوسىمشانى بەلسەندى پايدالانۋدا.
ال جوباعا 7 مىڭعا جۋىق شاعىن جانە ورتا بيزنەس سۋبەكتىلەرى تىركەلگەن. «Ashyq» جوباسىنىڭ ەنگىزىلۋى كاسىپكەرلەردىڭ ۇزدىكسىز جۇمىس ىستەۋىنە مۇمكىندىك بەردى. سونداي-اق ىندەت جۇقتىرعان 2,5 مىڭنان استام ادام جانە دەرتكە شالدىققان ناۋقاستارمەن بايلانىستا بولعان 2 مىڭ ازاماتتىڭ كارانتين رەجيمىن بۇزعانى انىقتالعان.
پرەزيدەنت بۇل باعىتتا اتقارىلعان جۇمىسقا وڭ باعا بەردى. ەرالى توعجانوۆ مەملەكەت باسشىسىنا فارماتسيەۆتيكا ونەركاسىبىن، عىلىمدى دامىتۋعا، سالاۋاتتى ءومىر سالتىن ساقتاۋ تۇجىرىمداماسى مەن الەۋمەتتىك كودەكستى ازىرلەۋگە، جۇمىسسىزدىقتىڭ الدىن الۋعا قاتىستى قولعا الىنعان شارالار تۋرالى ايتتى.
قاسىم-جومارت توقايەۆ بۇعان دەيىن تۇركىستان وبلىسىنىڭ باعىس جانە حيابون اۋىلدارىنداعى جاعدايدى رەتتەۋگە قاتىستى ۇكىمەتكە تاپسىرما بەرگەن بولاتىن. سوعان سايكەس، ەلدى مەكەندەرگە رەسمي مارتەبە بەرىلىپ، شەكارالارى ناقتىلانىپ، تۇرعىنداردىڭ جەر ۋچاسكەلەرى مەن دۇنيە- مۇلىكتەرىنىڭ ءتىزىمى جاسالدى. شىلدە ايىندا ايماقتاعى 6 اۋىل تابيعي گازبەن قامتاماسىز ەتىلەدى، كەلەسى جىلى باعىستا 300 ورىندىق مەكتەپ سالىنادى.
پرەزيدەنتكە جەر كوميسسياسىنىڭ جۇمىس قورىتىندىلارى جايىندا دا ەسەپ بەرىلدى.
كوميسسيا جۇمىسىندا 121 ماسەلە قاراستىرىلدى. قازىرگى تاڭدا تۇزەتۋلەر ەنگىزىلگەن ءتيىستى زاڭ جوباسى پارلامەنت ءماجىلىسىنىڭ قاراۋىندا جاتىر. كەزدەسۋ سوڭىندا مەملەكەت باسشىسى ءبىلىم جانە عىلىم، دەنساۋلىق ساقتاۋ، مادەنيەت، الەۋمەتتىك قورعاۋ ماسەلەلەرىنە قاتىستى ءبىرقاتار تاپسىرما بەردى.
