مەملەكەت باسشىسى ديماش قۇدايبەرگەندى تۋعان كۇنىمەن قۇتتىقتادى
«قۇرمەتتى ديماش! جاس كەزىڭنەن ونەر جولىن تاڭداپ، ۇزدىكسىز ەڭبەكتىڭ ناتيجەسىندە ۇلكەن بەلەستەردى باعىندىرا ءبىلدىڭ. الدىمەن رەسپۋبليكالىق، كەيىن حالىقارالىق بايقاۋلاردا دارا شىقتىڭ. ان ارقىلى ۇلتتىق قۇندىلىقتارىمىزدى دارىپتەپ، قازاقتىڭ ءتىلىن، قوڭىر دومبىراسىن، ىزگى داستۇرلەرىن الەمگە تانىتىپ كەلەسىڭ. الداعى ۋاقىتتا ەلىمىزدىڭ رۋحاني-مادەني سالاسىن وركەندەتۋگە مول ۇلەس قوسىپ، ءبىلىمىڭ مەن كاسىبي بىلىكتىلىگىڭدى جەتىلدىرە بەرەتىنىڭە سەنىم ارتامىن. وزىڭە دەنساۋلىق، جاڭا تابىستار تىلەيمىن!»، - دەپ جازىلعان مەملەكەت باسشىسىنىڭ قۇتتىقتاۋ حاتىندا. وسىدان كەيىن اقتوتى رايىمقۇلوۆا تۋعان كۇن يەسىن ءوز اتىنان قۇتتىقتاپ، شىعارماشىلىق تابىس تىلەدى.
«ءسىز ۇلى دالا ەلى ونەرىن عالامدىق دەڭگەيدە تانىتىپ كەلە جاتقان ونەرپاز رەتىندە حالىقتىڭ ىستىق ىقىلاسى مەن قۇرمەتىنە بولەنىپ جاتىرسىز. تۋعان جەردىڭ توپىراعىمەن دارىعان دارىن مەن تالعامنىڭ، تاباندى ىزدەنىس پەن قاجىرلى ەڭبەكتىڭ ارقاسىندا جاھان حالىقتارى ءسۇيىپ تىڭدايتىن انشىگە اينالدىڭىز. ءسىز باعىندىرعان بيىك بەلەستەر مەن تولاعاي تابىس ىزىڭىزدەن ەرگەن جاستار ءۇشىن ۇلگىلى سۇرلەۋ. الداعى ۋاقىتتا دا جۇرەك قىلىن شەرتەتىن تۋىندىلارىڭىزدىڭ قاتارى كوبەيىپ، ونەرسۇيەر قاۋىمدى قۋانتا بەرۋىڭىزگە تىلەكتەسپىن»، - دەدى مينيستر.
