ورمان ءوسىرۋ ءۇشىن جەر ۋچاسكەلەرى تەك قازاقستاندىقتارعا بەرىلەدى - سەنات قۇجاتتى ماجىلىسكە قايتاردى
نۇر-سۇلتان. قازاقپارات - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالدى.
قۇجاتقا تۇزەتۋلەر ەنگىزىلگەندىكتەن، زاڭ جوباسى ماجىلىسكە قايتارىلدى، دەپ حابارلايدى قازاقپارات ءتىلشىسى.
«ەلىمىزدىڭ ەگەمەندىگىن نىعايتۋ جانە حالىقتىڭ ازىق- تۇلىك قاۋىپسىزدىگىن قامتاماسىز ەتۋ ماقساتىندا، 2016 -جىلعى 6-مامىردا ق ر پرەزيدەنتىنىڭ جارلىعىمەن اۋىل شارۋاشىلىعى جەرلەرىن شەتەلدىكتەرگە، ازاماتتىعى جوق ادامدارعا، شەتەلدىك كومپانيالارعا، سونداي- اق شەتەلدىك ۇلەسى بار قازاقستاندىق كومپانيالارعا جالعا بەرۋگە، سونداي- اق قازاقستان رەسپۋبليكاسىنىڭ ازاماتتارى مەن زاڭدى تۇلعالارىنا جەكە مەنشىككە بەرۋگە موراتوريي ەنگىزىلدى. موراتوريي مەرزىمى 2021 -جىلدىڭ 31-جەلتوقسانىندا اياقتالاتىنىن ەسكەرە وتىرىپ، قازاقستان رەسپۋبليكاسىنىڭ پرەزيدەنتى قاسىم- جومارت كەمەل ۇلى توقايەۆ اعىمداعى جىلى 25-اقپاندا ۇلتتىق قوعامدىق سەنىم كەڭەسىنىڭ بەسىنشى وتىرىسىندا جەر ماسەلەسى قاشاندا حالقىمىز ءۇشىن اسا ماڭىزدى ەكەندىگىن ايتا وتىرىپ، شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭناما جۇزىندە ءبىرجولا تىيىم سالۋدى تاپسىردى»، - دەدى اۋىل شارۋاشىلىعى ءمينيسترى ساپارحان وماروۆ.
اتالعان تاپسىرمانى پرەزيدەنتتىڭ زاڭ شىعارۋ باستاماسى شەڭبەرىندە جەدەل جۇزەگە اسىرۋ قاجەت دەپ شەشىلدى. وسىعان بايلانىستى، ءتيىستى زاڭ جوباسىن پارلامەنت ءماجىلىسى ماقۇلداپ، اعىمداعى جىلدىڭ 14 ساۋىرىندە سەناتقا ەنگىزدى.
«ۇسىنىلعان زاڭ جوباسىندا اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا، شەتەلدىك ۇلەسى بار قازاقستاندىق كومپانيالارعا، ازاماتتىعى جوق ادامدارعا، حالىقارالىق قاتىسۋ ۇلەسى بار عىلىمي ورتالىقتارعا، سونداي- اق قانداستارعا بەرۋگە تولىقتاي تىيىم سالۋ كوزدەلگەن. بۇدان باسقا، زاڭ جوباسىندا بۇدان بۇرىن شەتەلدىكتەر جانە شەتەلدىك ۇلەسى بار قازاقستاندىق كومپانيالار جالعا العان اۋىل شارۋاشىلىعى جەرلەرىن پايدالانۋ مەرزىمى ۇزارتىلمايتىنى جانە ولار پايدالانۋ مەرزىمى اياقتالعانعا دەيىن عانا يەلىكتە بولاتىنى كوزدەلگەن. ال قانداستار جەر ۋچاسكەسىن جەكە قوسالقى شارۋاشىلىق، باق ءوسىرۋ جانە ساياجاي قۇرىلىسى ءۇشىن الا الادى، اۋىل شارۋاشىلىعى جەرلەرىن قازاقستان ازاماتتىعىن العاننان كەيىن عانا جالعا الۋعا مۇمكىندىگى بار» ، - دەدى مينيستر. زاڭ جوباسىن ەكىنشى وقىلىمدا تالقىلاۋ بارىسىندا سەناتور ءابدالى نۇرالييەۆ قۇجاتتىڭ نورمالارىنا قاتىستى سەناتتىڭ تۇراقتى كوميتەتتەرى مەن جەكەلەگەن سەنات دەپۋتاتتارىنان 2 - ۇسىنىس تۇسكەنىن، ولار سالىستىرمالى كەستەگە ەنگىزىلگەنىن اتاپ ءوتتى.
«اتالعان ۇسىنىستار بويىنشا جەكە ورمان ءوسىرۋ ءۇشىن جەر ۋچاسكەلەرىن تەك قازاقستان رەسپۋبليكاسىنىڭ ازاماتتارىنا جانە شەتەلدىك ۇلەسى جوق قازاقستان رەسپۋبليكاسىنىڭ زاڭدى تۇلعالارىنا بەرۋ تۋرالى ءتيىستى وزگەرىس پەن تولىقتىرۋدى جەر كودەكسىنىڭ 48-شى جانە 128-بابىنا ەنگىزۋ ۇسىنىلىپ وتىر. زاڭ جوباسى قازاقستان رەسپۋبليكاسىنىڭ كونستيتۋتسياسىنا جانە قولدانىستاعى زاڭدارىنا سايكەس كەلەدى. زاڭ جوباسىن قابىلداۋ قۇقىقتىق جانە الەۋمەتتىك- ەكونوميكالىق سالدارىنىڭ كەرى اسەرىن تيگىزبەيدى، مەملەكەتتىك بيۋدجەتتەن قوسىمشا قارجىلاردى تالاپ ەتپەيدى»، - دەدى ءا. نۇراليەۆ. تالقىلاۋ كەزىندە پالاتا دەپۋتاتتارى اتالعان ۇسىنىستارعا قولداۋ ءبىلدىردى.
