مەملەكەت باسشىسى قىتايدىڭ قازاقستانداعى ەلشىسى جاڭ شياودى قابىلدادى

پرەزيدەنت قاسىم-جومارت توقايەۆ داعدارىستان كەيىنگى كەزەڭدە قازاقستاننىڭ قىتاي حالىق رەسپۋبليكاسىمەن كوپجاقتى ستراتەگيالىق سەرىكتەستىگىن ودان ءارى دامىتۋعا قاتىستى ناقتى ۇستانىمىن جەتكىزدى.

«قازاقستان مەن ق ح ر اراسىنداعى ءوزارا ىنتىماقتاستىق پەن ستراتەگيالىق سەرىكتەستىك ءارتۇرلى ساياسي تەندەنتسيالارعا ەمەس، بەرىك نەگىزگە قۇرىلعان. قازاقستان مەن قىتاي - جاقىن كورشى، سەنىمدى دوس جانە ستراتەگيالىق ارىپتەس. بۇل ىنتىماقتاستىق قازاقستاننىڭ ۇلتتىق مۇددەسىنە ساي كەلەدى. ەلدەرىمىزدىڭ اراسىنداعى بارلىق ماسەلە سىندارلى ءارى سەنىمدى ديالوگ ارقىلى شەشىلەدى»، - دەدى مەملەكەت باسشىسى.

ق ح ر ءتوراعاسى شي جينپيڭگە ىستىق سالەمىن جولداعان قازاقستان پرەزيدەنتى قىتاي باسشىسىن وزىنە ىڭعايلى ۋاقىتتا ەلىمىزگە مەملەكەتتىك ساپارمەن كەلۋگە شاقىردى.

قاسىم-جومارت توقايەۆ قازاقستان مەن قىتايدىڭ COVID-19 پاندەمياسى باستالعاننان بەرگى ءبىر-بىرىنە كورسەتكەن ءوزارا كومەگىن جوعارى باعالادى.

كەزدەسۋدە قازاقستاننىڭ قىتايدان ۆاكسينا الۋدى جوسپارلاپ وتىرعانى، رەسەيلىك «سپۋتنيك V» ەكپەسىمەن جانە وتاندىق «QazVac» ۆاكسيناسىن قولدانۋ ارقىلى ۇكىمەتتىڭ حالىققا جاپپاي ەكپە سالۋ جۇمىسى ەكپىندى تۇردە ىسكە اساتىنى ايتىلدى.

بيىل قازاقستاننىڭ تاۋەلسىزدىك العانىنا جانە قازاقستان مەن قىتاي اراسىنداعى ديپلوماتيالىق قاتىناستاردىڭ ورناعانىنا 30 جىل تولىپ وتىر.

مەملەكەت باسشىسىنىڭ پىكىرىنشە، الدا كەلە جاتقان وسىناۋ مەرەيتويلىق مەزەت بۇعان دەيىن ءجۇرىپ وتكەن جولدىڭ سالماعىن ۇعىنۋعا، ستراتەگيالىق سەرىكتەستىكتىڭ جاڭا ماقساتتارىن انىقتاۋعا جاقسى مۇمكىندىك بەرەدى. قاسىم-جومارت توقايەۆ وسى ۋاقىت ارالىعىندا ەكى ەل ءوزىنىڭ دامۋ جولىندا، سونداي-اق، جان-جاقتى ىنتىماقتاستىقتى نىعايتۋدا ايتارلىقتاي ناتيجەلەرگە قول جەتكىزدى دەپ سانايدى.

مەملەكەت باسشىسى قىتاي حالقىن ەلدەگى كەدەيلىكتى ءتۇپ تامىرىمەن جويۋ جونىندەگى تاريحي مىندەتتى ورىنداۋىمەن، كوروناۆيرۋس ىندەتىمەن كۇرەستەگى جەڭىسىمەن جانە ەكونوميكانى قايتا قالپىنا كەلتىرۋدەگى ۇلكەن جەتىستىگىمەن قۇتتىقتادى.

پرەزيدەنت قازاقستاننىڭ جوعارى دەڭگەيدەگى ساياسي بايلانىستاردى نىعايتۋعا، ەكونوميكالىق قارىم-قاتىناستاردى كەڭەيتۋگە ءازىر ەكەنىن راستادى.

ق ح ر - قازاقستاننىڭ ەڭ ءىرى سىرتقى ساۋدا سەرىكتەسى. 2020-جىلى ەكى ەل اراسىنداعى تاۋار اينالىمى 15 ميلليارد دوللاردى قۇرادى.

ەكىجاقتى ساۋدا جانە ينۆەستيتسيالىق بايلانىستاردى ورنىقتى جانە تەڭگەرىمدى دامۋ دەڭگەيىنە شىعارۋ ءۇشىن مەملەكەت باسشىسى قازاقستان-قىتاي شەكاراسىنداعى اۆتوموبيل جانە تەمىرجول وتكىزۋ پۋنكتتەرىنىڭ جۇمىسىن قالىپتى رەجيمگە قايتارۋعا، پاندەميادان كەيىنگى كەزەڭدە ولاردىڭ وتكىزۋ قابىلەتىن ارتتىرۋعا قاتىستى ۇسىنىستار ايتتى.

پرەزيدەنت ازاماتتار مەن جۇك تاسىمالدايتىن تۇراقتى اۋە رەيستەرىن قايتا قالپىنا كەلتىرۋگە مۇمكىندىك بار دەپ سانايدى. سيفرلاندىرۋ، جاسىل ەكونوميكا، يننوۆاتسيا سەكىلدى سالالار بويىنشا ايتارلىقتاي جەتىستىككە جەتكەن قىتاي تاراپىمەن ىنتىماقتاستىقتى دامىتۋ ءۇشىن ەكىجاقتى كۇش-جىگەردى جۇمىلدىرۋ اسا ماڭىزدى.

قاسىم-جومارت توقايەۆ قازاقستاننىڭ «نۇرلى جول» ستراتەگياسىن قىتايدىڭ «ءبىر بەلدەۋ جانە ءبىر جول» باستاماسىمەن ۇشتاستىرۋ جونىندەگى جۇمىستى جانداندىرۋ قاجەتتىگىن اتاپ ءوتتى.

سونداي-اق قازاقستاننىڭ 2025-جىلعا دەيىنگى دامۋىنىڭ ۇلتتىق جوسپارىنان جانە قىتايدىڭ «قوس اينالىم» تۇجىرىمداماسىنان تۋىندايتىن ءوزارا ءتيىمدى كووپەراتسيانى تەرەڭدەتۋ مۇمكىندىكتەرىن تولىققاندى پايدالانۋعا شاقىردى.

مەملەكەت باسشىسى حالىقارالىق دەڭگەيدەگى باستى ماسەلەلەر بويىنشا قازاقستان مەن قىتايدىڭ ۇستانىمدارى سايكەس كەلەتىنىن ايتتى. پرەزيدەنت ازياداعى ءوزارا ىقپالداستىق جانە سەنىم شارالارى كەڭەسىن قولداعانى ءۇشىن قىتاي تاراپىنا ريزاشىلىعىن ءبىلدىرىپ، بىرىككەن ۇلتتار ۇيىمى، شاڭحاي ىنتىماقتاستىق ۇيىمى شەڭبەرىندە جانە «ورتالىق ازيا +قىتاي» ىنتىماقتاستىق فورماتىندا دا ودان ءارى بىرلەسىپ جۇمىس ىستەۋگە قازاقستاننىڭ دايىن ەكەنىن جەتكىزدى.