قازاقستاندىق ۆاكسينا ءوندىرىسى قاشان باستالادى - مينيسترلىك جاۋابى

ونى ق ر د س م مەديتسينالىق جانە فارماتسيەۆتيكالىق باقىلاۋ كوميتەتى نۇر- سۇلتان قالالىق دەپارتامەنتىنىڭ باسشىسى نۇرلىبەك اسىلبەكوۆ جاريا ەتتى، دەپ حابارلايدى قازاقپارات ءتىلشىسى.

«وتاندىق ۆاكسينا ءوندىرىسى بيولوگيالىق قاۋىپسىزدىك ماسەلەلەرى جونىندەگى عىلىمي- زەرتتەۋ ينستيتۋتىندا جۇرگىزىلەتىن بولادى جانە ءساۋىر ايىنىڭ سوڭىندا ۆاكسينانىڭ 50 مىڭ دوزاسى جەتكىزىلەدى دەپ كۇتىلەدى. ودان كەيىن عىلىمي- زەرتتەۋ ينستيتۋتىنىڭ مۇمكىنشىلىگىنە قاراي كەستەگە، وندىرىستىك قۋاتىنا بايلانىستى بولادى. بۇعان قوسا، قازىرگى ۋاقىتتا قوسىمشا ءوندىرىس بويىنشا كەلىسسوز جۇرگىزىلىپ جاتىر. تۇركيانىڭ Atabay كومپانيامەن QazVak ۆاكسيناسىن شىعارۋ مۇمكىنشىلىگىنە قاتىستى ۋاعدالاستىققا قول جەتكىزىلدى. بۇل پروتسەدۋرا ءالى اياقتالعان جوق» ، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا.

ونىڭ اتاپ وتۋىنشە، قازىرگى ۋاقىتتا تۇركيالىق كومپانيامەن كەلىسسوز جۇرگىزىلۋدە.

«تۇركياداعى ءوندىرىس وشاعىنا سۋبستانسيانى بەرۋ جانە ۆاكسينانىڭ قاجەتتى كولەمىن شىعارۋ بويىنشا تەحنولوگيالىق ماسەلەلەر زەردەلەنىپ جاتىر. بۇگىندە 100 پايىز كەلىسىم جوق، ماسەلە پىسىقتالۋ ۇستىندە. ەگجەي- تەگجەيلى اقپاراتتى وكىلەتتى ورگاننان الۋ قاجەت»، - دەدى نۇرلىبەك اسىلبەكوۆ.

اۆتور: مارلان جيەمباي