بالالار ۇيلەرىن تەكسەرۋ كۇشەيتىلەدى - ۇكىمەت
«بالالاردىڭ قۇقىقتارى مەن زاڭدى مۇددەلەرىن قامتاماسىز ەتۋ ءۇشىن رەسپۋبليكادا بالالار قۇقىقتارىن قورعاۋ سالاسىنداعى مەملەكەتتىك باقىلاۋ جۇيەسى قالىپتاستىرىلعان. «Nur Otan» پارتياسى جانىنداعى وتباسى، اايەلدەر مەن بالالار قۇقىقتارىن قورعاۋ جونىندەگى كەڭەستىڭ جۇمىس توبى وتكىزگەن مونيتورينگ ناتيجەلەرى 2019 -جىلدىڭ 22-قاراشاسىندا جەرگىلىكتى اتقارۋشى ورگانداردىڭ قاتىسۋىمەن ق ر ۇكىمەتى جانىنداعى كامەلەتكە تولماعاندار ءىسى جانە ولاردىڭ قۇقىقتارىن قورعاۋ جونىندەگى ۆەدومستۆوارالىق كوميسسيا وتىرىسىندا تالقىلاندى»، - دەدى ول. ونىڭ اتاپ وتۋىنشە، كوميسسيا جۇمىسىنىڭ قورىتىندىسىندا جەرگىلىكتى اتقارۋشى ورگاندارعا ناقتى ۇسىنىمدار بەرىلدى.
ورتالىق مەملەكەتتىك ورگاندار، كوميسسيا بالالار قۇقىقتارىن قورعاۋ بويىنشا قىزمەتتەردى جۇزەگە اسىراتىن ۇيىمدارداعى كامەلەتكە تولماعانداردىڭ تاربيلەنۋ، ءبىلىم الۋ جاعدايلارىن باقىلاۋدى قامتاماسىز ەتەدى.
«ءبىلىم جانە عىلىم، ەڭبەك جانە حالىقتى الەۋمەتتىك قورعاۋ مينيسترلىكتەرى 2020 -جىلى ارناۋلى الەۋمەتتىك قىزمەت كورسەتەتىن 386 ءبىلىم بەرۋ ۇيىمى مەن 20 بالالار ورتالىققا تەكسەرۋ جۇرگىزدى. سونىمەن قاتار 2020 -جىلى باس پروكۋراتۋرا اتا-انالارىنىڭ قامقورلىعىنسىز قالعان بالالار مەن جەتىم بالالارعا ارنالعان 76 ۇيىمدى ەكى رەت تەكسەردى. بيىل بۇل جۇمىس كۇشەيتىلىپ، وڭىرلىك پروكۋراتۋرالار مەن ءبىلىم بەرۋ ورگاندارىنىڭ 300 بالالار مەكەمەسىن كەشەندى تەكسەرۋى جوسپارلانعان. سونىمەن قاتار اتا-انالارىنىڭ قامقورلىعىنسىز قالعان بالالار مەن جەتىم بالالارعا ارنالعان 116 ۇيىم قارجى مينيسترلىگىنىڭ قارجىلىق قىزمەت بولىگىنە مەملەكەتتىك اۋديت جۇرگىزىلەتىن نىساندار تىزىلىمىنە ەنگىزىلگەن»، - دەدى اسقار مامين.
اۆتور: مارلان جيەمباي
