ەلورداداعى كوروناۆيرۋستىڭ ءورشۋى شىلدە ايىنداعى جاعدايعا ۇقساپ كەلەدى - باسقارما باسشىسى

«بۇگىندە قالامىزدا كوروناۆيرۋس ينفەكسياسىنىڭ جاعدايى تۇراقسىز. ىندەتتىڭ ءورشۋى بويىنشا ەلوردا ءالى دە «قىزىل» ايماقتا. 14-ناۋرىزدان باستاپ، اۋرۋ جۇقتىرۋ 24 پايىزعا ءوستى. ەگەر اقپان ايىندا تاۋلىك ىشىندە ورتا ەسەپپەن 100 جاعداي تىركەلسە، 25-ناۋرىزعا سايكەس بۇل كورسەتكىش 230 عا دەيىن جەتىپ وتىر. پاندەميانىڭ ورشۋىندەگى اۋىرۋمەن سالىستىرعاندا، قازىرگى جاعداي وتكەن جىلعى جازداعى كەزەڭمەن ۇقساس بولىپ وتىر»، - دەدى ت. مۇراتوۆ ەلوردا اكىمدىگىندە وتكەن ونلاين بريفينگتە.

ونىڭ ايتۋىنشا، ناۋرىزدىڭ 25 كۇنىندە-اق 3754 جاڭا ك ۆ ي جاعدايى تىركەلگەن، مۇنى 2020 -جىلعى شىلدە ايىنىڭ باسىنداعى كورسەتكىشكە تەڭەۋگە بولادى. جۇقپالى اۋرۋلار ستاتسيونارىندا 480 ادام جاتىر (توسەك- ورىننىڭ 64 پايىزى). دارىگەر جانساقتاۋ بولىمىندە ەم قابىلدايتىن ناۋقاستاردىڭ دا سانى ارتقانىن اتاپ ءوتتى. قازىرگى ۋاقىتتا بۇل بولىمدە 55 ناۋقاس جاتىر، ونىڭ ىشىندە 14 ى جاساندى تىنىس الۋ اپپاراتىمەن دەم الۋدا.

اۆتور: ايجان سەرىكجان قىزى