باقىت سۇلتانوۆ: ازىق-تۇلىك باعاسىن تۇراقتاندىرا الماعان اكىم ورىنباسارلارىن جاۋاپقا تارتۋ كەرەك

نۇر-سۇلتان. قازاقپارات - ازىق-تۇلىك باعاسىن تۇراقتاندىرا الماعان اكىم ورىنباسارلارىن جاۋاپكەرشىلىككە تارتۋ قاجەت.

بۇل تۋرالى ۇكىمەت وتىرىسىندا ق ر ساۋدا جانە ينتەگراتسيا ءمينيسترى باقىت سۇلتانوۆ ايتتى، دەپ حابارلايدى قازاقپارات ءتىلشىسى.

«الەۋمەتتىك ماڭىزى بار تاۋارلاردىڭ باعاسىن ۇستاپ تۇرۋ بويىنشا وڭىرلەردىڭ جاۋاپكەرشىلىگىن اتاپ وتكەن ءجون. ولاردىڭ جۇمىسىن تالداۋ قورىتىندىلارى بويىنشا مينيسترلىك 1-توقساندا اتقارىلعان جۇمىس تۋرالى اقپارات ەنگىزەدى جانە شارالاردىڭ ناقتى ناتيجەلەرى بولماعان جاعدايدا ءبىز اكىمدەرىنىڭ جەتەكشىلىك ەتەتىن ورىنباسارلارىن جاۋاپكەرشىلىككە تارتۋ تۋرالى ماسەلەگە باستاماشى بولامىز»، - دەدى اگروونەركاسىپتىك كەشەندى دامىتۋدىڭ نەگىزگى باعىتتارى جانە ينۆەستيتسيالىق جوبالاردىڭ ىسكە اسىرىلۋى تۋرالى بايانداعان باقىت سۇلتانوۆ.

ونىڭ ايتۋىنشا، ازىق-تۇلىك باعاسىن تۇراقتاندىرۋدا نارىقتىڭ فورۆاردتىق ساتىپ الۋ جانە «اينالىم سحەماسى» سىندى قۇرالدارى تيىمدىلىگىن كورسەتىپ وتىر. بۇگىنگى تاڭعا جەرگىلىكتى بيۋدجەتتەردەن اتالعان قۇرالدارعا 21,9 ميلليارد تەڭگە ءبولىندى.

«تەتىك ءتيىمدى، دەگەنمەن نارىققا ايتارلىقتاي اسەر ەتۋ ءۇشىن قارجىلاندىرۋدى كەڭەيتۋ قاجەت. وتاندىق وندىرۋشىلەرمەن كەلىسىمشارتتاردى «قولمەن باسقارۋ» رەجيمىندە جۇرگىزە وتىرىپ، جەلىلەرگە ارزانداتىلعان كرەديتتەردى 50 ميلليارد تەڭگەگە دەيىن ۇلعايتۋ كەرەك»، - دەدى ول.

اۆتور: مارلان جيەمباي