باس بانكير قازاقستان قالىپتى ومىرگە ورالۋعا قانشا ۋاقىت كەرەك ەكەنىن ايتتى
بۇل تۋرالى بۇگىن ۇكىمەت وتىرىسىندا ق ر ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«كوروناۆيرۋسقا قارسى ۆاكسينا ەگۋدىڭ باستالۋىنا بايلانىستى وپتيميزمگە قاراماستان، 2021 -جىلدىڭ العاشقى ايىندا ءالى دە جوعارى بەلگىسىزدىك ساقتالدى. ۆيرۋستىڭ جاڭا شتاممىنىڭ تارالۋى جانە ءبىرقاتار ەلدەردە ۆاكسينالىق پروتەكسيونيزمنىڭ كۇشەيۋى الەمدىك ەكونوميكانىڭ قالپىنا كەلۋ قارقىنىن تەجەۋدە. ۆاكسينا ءوندىرىسى مەن ءبولىنۋى بىركەلكى جۇرگىزىلمەي وتىر. ۆاكسيناتسيا قارقىنى بويىنشا يزرايل الدىڭعى قاتارداعى ەل بولىپ وتىر. وندا حالىقتىڭ 41,6 پايىزى ۆاكسينانىڭ ءبىر جانە ودان دا كوپ دوزاسىن الدى»، - دەدى ول.
ونىڭ ايتۋىنشا، الەمنىڭ ءىرى ەكونوميكالارىندا ۆاكسيناتسيا دەڭگەيى ايتارلىقتاي تومەن. ماسەلەن، ۇلى بريتانيادا - 20,2، امەريكا قۇراما شتاتتارىندا - %10,9، ەۋرووداقتا - 2,9 پايىز عانا. كوپتەگەن دامۋشى ەلدەر ءالى ۆاكسينا ەگۋدى باستاعان دا جوق.
«حالىقارالىق ساراپشىلاردىڭ بولجامى بويىنشا ۆاكسيناتسيانىڭ قازىرگى قارقىنى كەزىندە الەم حالقىنىڭ 75 پايىزىن قامتۋ جانە قالىپتى ومىرگە قايتارۋ ءۇشىن 7 جىلدان استام ۋاقىت قاجەت بولادى»، - دەدى ەربولات دوسايەۆ.
ۇ ب ءتوراعاسىنىڭ ايتۋىنشا، قاڭتاردا پاندەميانىڭ قايتا ورشۋىنەن جانە ۆاكسينالاردى تاراتۋدىڭ كەشىگۋىنەن ەكونوميكانىڭ باياۋلاۋى مۇمكىن دەگەن الاڭداۋشىلىققا بايلانىستى جاھاندىق قور نارىقتارى تومەندەدى. ا ق ش- تاعى نارىقتار ءبىرقاتار كومپانياعا قاتىستى كاسىبي ەمەس ترەيدەرلەردىڭ الىپساتارلىق مامىلەلەرىنە بايلانىستى قوسىمشا قىسىمعا ۇشىرادى. بۇل قۇبىلمالىلىق يندەكسىنىڭ 22 دەن 33 پايىزعا دەيىن 11 پايىزدىق تارماققا وسۋىنە اكەلدى. سونىڭ اياسىندا ا ق ش دوللارى نىعايدى. بۇل ا ق ش- تىڭ مەملەكەتتىك باعالى قاعازدارى كىرىستىلىگىنىڭ وسۋىمەن بىرگە التىن باعاسىنىڭ تومەندەۋىنە الىپ كەلدى.
«شەكتەۋ شارالارىن قاتاڭداتۋ جاعدايىندا ىسكەرلىك بەلسەندىلىكتىڭ جاھاندىق يندەكسى بيىلعى جىلعى قاڭتاردا 52,3 تارماققا دەيىن، ونىڭ ىشىندە ءوندىرىس پەن جاڭا تاپسىرىستار ءوسۋىنىڭ باياۋلاۋى ناتيجەسىندە ەۋرووداقتا - 48,7 گە دەيىن، قىتايدا - 51,5 كە دەيىن تومەندەدى. بىركەلكى ەمەس جانە باياۋ ۆاكسيناتسيا، جەتكىزۋ مەن وندىرۋدەگى قيىندىقتار، جاڭا شتاممداردىڭ پايدا بولۋى جانە ۇنەمى ەنگىزىلەتىن شەكتەۋلەر 2021 -جىلى جاھاندىق سۇرانىستىڭ ءوسۋىن تەجەيتىن بولادى»، - دەدى ول.
