زەينەتاقى جيناعىن پايدالانۋ: ءوتىنىمدى بىرنەشە رەت بەرۋگە بولمايدى

نۇر-سۇلتان. قازاقپارات - زەينەتاقى جيناعىن العىسى كەلەتىن ازاماتتار قانداي كەدەرگىلەرگە جولىقتى؟

بۇل سۇراققا «وتباسى بانك» ا ق ءتوراعاسى ءلاززات يبراگيموۆا جاۋاپ بەردى، دەپ حابارلايدى قازاقپارات ءتىلشىسى.

«كەيبىر ازاماتتارعا (شامامەن 6974 ادام) ءوز ءوتىنىمىن بەرگەن كەزدە - جەكە زەينەتاقى قورى بۇعان دەيىن ورىندالماعان وتىنىمدەردى ەسكەرگەندە قاراجات جەتكىلىكسىز دەگەن جاۋاپ كەلگەن. بۇل - ءبىرىنشى كۇنى بىرنەشە ءوتىنىم بەرگەن ازاماتتار. ولار الدىمەن ءوتىنىمدى جىبەرىپ الىپ، كەيىن سوڭىنا دەيىن جىبەرمەدىم دەپ ويلاپ، تاعى ءبىر نەمەسە بىرنەشە رەت ءوتىنىش جولداعان. ال ول وتىنىشتەردىڭ بارلىعى جويىلا بەرگەن. ءبىز قازىرگى ۋاقىتتا ءبىز بۇل پروتسەستى قاراپ، زەرتتەپ جاتىرمىز. ءبىرىنشى رەت ءوتىنىم بەرىلگەننەن كەيىن ەكىنشى ءوتىنىم بەرۋگە بولمايدى. ءبىراق بۇل ماسەلەنى رەتتەۋ ءۇشىن ازىرلەۋشىلەرگە ۋاقىت كەرەك»، - دەدى ءلاززات يبراگيموۆا و ك ق- دا ءوتىپ جاتقان باسپا ءسوز ءماسليحاتىندا.

سونداي-اق، ونىڭ سوزىنە قاراعاندا قازاقستاندىقتار مىناداي پروبلەماعا تاپ بولعان. اتاپ ايتقاندا، ولاردىڭ وتىنىمىنە «وتىنىشتە كورسەتىلگەن سوما الۋعا بولاتىن مولشەردەن اسىپ كەتتى» دەپ كورسەتىلگەن. ءلاززات يبراگيموۆانىڭ ايتۋىنشا بۇل ءوتىنىم بەرۋشىلەر سومانى كورسەتكەندە قاتەلەسىپ كەتكەن. ودان بولەك ءارتۇرلى مارتەبەسى بار 26264 ءوتىنىم قارالۋدا.

«تاعى ءبىر ازاماتتار «ب ج ز ق ءسىزدىڭ ءوتىنىشىڭىزدى قاراۋعا قابىلدادى» دەگەن جاۋاپتى كورگەننەن كەيىن قايتادان پورتالداعى جەكە كابينەتىنە كىرىپ، ناتيجەسىن كورگىسى كەلگەن. ءسىرا، بارلىق پروتسەدۋرالاردى سوڭىنا دەيىن ءوتىپ، وتىنىشكە قول قويۋ كەرەك دەپ كۇتسە كەرەك. الەۋمەتتىك جەلىلەردەگى رەاكتسياعا قاراعاندا، كوپتەگەن ادامدار ەرەجەلەردى مۇقيات زەرتتەپ، قارجى ولاردىڭ ارنايى شوتىندا پايدا بولعاننان كەيىن بجزق- داعى سالىم كورسەتكىشى تومەندەگەنىن ءتۇسىندى»، - دەپ قوستى ول.

ەسكە سالساق، 2021 -جىلى 2-قاڭتاردا ق ر پرەزيدەنتى قاسىم-جومارت توقايەۆ زەينەتاقى جيناعىنىڭ ءبىر بولىگىن ماقساتتى پايدالانۋعا قاتىستى زاڭعا قول قويدى. قازاقستاندىقتاردىڭ زەينەتاقى جيناقتارىن پايدالانۋ ءۇشىن جاڭارتىلعان «جەتكىلىكتىلىك شەگى» جاريالاندى.

زەينەتاقى جيناعىنان الۋعا بولاتىن سوما ب ج ز ق سايتىندا اۆتوماتتى تۇردە كورسەتىلەدى. 23 -قاڭتاردان قازاقستاندا زەينەتاقىنىڭ ءبىر بولىگىن الۋعا ءوتىنىم قابىلداۋ باستالدى. ارنايى پورتالدا زەينەتاقىنىڭ ءبىر بولىگىن الۋعا ءوتىنىم قابىلداۋ باستالعالى ءۇش ساعاتتىڭ ىشىندە 4 مىڭنان استام ادام ءوتىنىش بەردى.

اۆتور: ايان بەكەن ۇلى