ەلباسى: كەيبىر كۇشتەر ەتنيكالىق ماسەلەلەردى جەكە ماقساتتارىنا پايدالانعىسى كەلەدى
بۇل تۋرالى بۇگىن قازاقستان حالقى اسسامبلەياسى كەڭەسىنىڭ وتىرىسىندا ق ر تۇڭعىش پرەزيدەنتى - ەلباسى، ق ح ا ءتوراعاسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«جاقىن ارادا ءبىز پارلامەنت ءماجىلىسىنىڭ جاڭا قۇرامىن سايلاۋعا كىرىسەيىك دەپ وتىرمىز. پارلامەنتكە ەڭ لايىقتى دەگەن ادامدار ءوتۋ ءتيىس. سول ءۇشىن «نۇر وتان» پارتياسى پرايمەريز وتكىزدى. قاتىسام دەگەندەردىڭ بارلىعى قاتىستى، ءوز پىكىرلەرىن ايتتى. ول پىكىرلەر جينالدى. ونىڭ پايداسى زور بولادى دەپ سانايمىن. الايدا كەيبىر كۇشتەردىڭ ارا- تۇرا ەتنيكالىق ماسەلەلەردى ءوز جەكە ماقساتتارىنا پايدالانۋ پيعىلى بار ەكەندىگىن دە ۇمىتپاۋ كەرەك. سيفرلىق تەحنولوگيالاردى تەرىس ويلى ادامداردىڭ قوعام مۇددەسىنە قارسى قولدانۋى دا جيىلەپ بارا جاتقانى دا راس»، - دەدى ق ر تۇڭعىش پرەزيدەنتى.
وسى رەتتە ەلباسى قازاقستان حالقى اسسامبلەياسى مەن وكىلەتتى ورگاندار ەڭ الدىمەن ءتىل جانە اقپارات سالاسىنا قاتىستى ماسەلەلەردە ەتنوسارالىق قاتىناستاردى ساياساتقا اينالدىرماۋ جاعىنا كوڭىل ءبولۋ كەرەكتىگىن باسا ايتتى.
«اسسامبلەيانىڭ اقپاراتتىق يدەولوگيالىق جۇمىسىنا تولەرانتتىلىق سەزىمىن كۇشەيتۋگە، جاستار اراسىنداعى الەۋمەتتىك جەلىدەگى كسەنوفوبياعا قارسى كۇرەسكە ەرەكشە ءمان بەرگەن ءجون دەپ سانايمىن»، - دەدى نۇرسۇلتان نازاربايەۆ.
اۆتور: مارلان جيەمباي
