ەلدەگى ساياسي جانە قوعامدىق كۇشتەر حالىق بىرلىگىن نىعايتۋ جونىندە مەموراندۋم قابىلداعانى دۇرىس - نۇرسۇلتان نازاربايەۆ

بۇل تۋرالى بۇگىن قازاقستان حالقى اسسامبلەياسى كەڭەسىنىڭ وتىرىسىندا ق ر تۇڭعىش پرەزيدەنتى - ەلباسى، ق ح ا ءتوراعاسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

«ەلدەگى ساياسي جانە قوعامدىق كۇشتەر حالىق بىرلىگىن نىعايتۋ جونىندە مەموراندۋم قابىلداعانى دۇرىس. ول مەموراندۋمدى دايىنداۋىمىز كەرەك. اسسامبلەيا وسى باستامانى قولعا السا، دۇرىس بولار ەدى. بىرلىك، كەلىسىم، تەڭدىك - ءبىزدىڭ نەگىزگى پرينتسيپتەرىمىز. ولاردى قورعاۋعا بارلىعىمىز كۇش سالۋىمىز كەرەك. اسسامبلەيانى جالپى ازاماتتىق جانە جالپى ۇلتتىق ينستيتۋت رەتىندە دامىتا بەرۋىمىز كەرەك»، - دەدى ق ر تۇڭعىش پرەزيدەنتى.

سونىمەن بىرگە، نۇرسۇلتان نازاربايەۆ اسسامبلەيانىڭ ورتالىق اپپاراتىنىڭ، وڭىرلىك قۇرىلىمداردىڭ جانە ەتنومادەني بىرلەستىكتەردىڭ تيىمدىلىگىن ارتتىرۋ قاجەت دەپ ەسەپتەيتىندىگىن باسا ايتتى.

«بۇل ەڭ اۋەلى اسسامبلەياعا «قازاقستان-2050» ستراتەگياسى العا قويعان اۋقىمدى مىندەتتەردى، سونىمەن قاتار، 30 ءوسىپ- وركەندەگەن ەلدىڭ قاتارىنا قوسىلۋ ماقساتىن جۇزەگە اسىرۋعا مۇمكىندىك بەرەدى. ءبىزدىڭ جۇمىس ىستەيتىن باعدارلامامىز بار. قازىر ءبارىمىز قيىن جاعدايدا تۇرمىز. دەگەنمەن، مىقتى مەملەكەت قۇردىق، اياعىنان تىك تۇرعىزدىق. قازىر كۇشىمىز دە، قاراجاتىمىز دا بار. بۇل توقىراۋدان دا شىعامىز. ەندى قازىر ارى قاراي ورلەۋ، وركەندەۋ ماسەلەسىن العا قويۋىمىز كەرەك»، - دەدى ەلباسى.

اۆتور: مارلان جيەمباي