وڭىرلەر پرەزيدەنت تاپسىرمالارىن ىسكە اسىرۋ ءۇشىن بارلىق شارالاردى قابىلداۋى ءتيىس - اسقار مامين

بۇل تۋرالى بۇگىن ۇكىمەت وتىرىسىندا پرەمەر-مينيستر اسقار مامين ايتتى، دەپ حابارلايدى قازاقپارات ءتىلشىسى.

«ون ايدىڭ قورىتىندىسى بويىنشا ەكونوميكانىڭ ناقتى سەكتورى ءوسۋدىڭ وڭ قارقىنىن كورسەتىپ وتىر. وڭدەۋ ونەركاسىبىندەگى ءوسىم 3,2 پايىز، ونىڭ ىشىندە تاماق ونەركاسىبىندە - 3,4، فارماتسيەۆتيكادا - 39,7، دايىن مەتالل بۇيىمدارى وندىرىسىندە - 19,5، ماشينا جاساۋدا - 16,5، ونىڭ ىشىندە اۆتوموبيل جاساۋدا - 53,6، قاعاز بۇيىمدارىن شىعارۋ - 15 جانە جەڭىل ونەركاسىپتە - 16,4 پايىز. قۇرىلىس كولەمى 10,7 پايىزعا ارتتى، تۇرعىن ءۇيدى پايدالانۋعا بەرۋ - 9,7 پايىز نەمەسە شامامەن 10,7 ميلليون شارشى مەترگە كوبەيدى. اۋىل شارۋاشىلىعىندا 5,2 پايىز ورنىقتى ءوسىم قامتاماسىز ەتىلدى»، - دەدى ۇكىمەت باسشىسى.

ونىڭ اتاپ وتۋىنشە، تاۋ-كەن سالاسىنىڭ ماڭىزدى باعىتتارى بويىنشا وڭ قارقىن ساقتالىپ وتىر.

تەمىر كەنىن وندىرۋدەگى ءوسىم - 1 پايىز، باسقا دا پايدالى قازبالار وندىرىسىندە - 0,7 پايىز بولدى. وپەك+ كەلىسىمدەرىن ورىنداۋ قاجەتتىلىگىنە بايلانىستى مۇناي ءوندىرۋ كولەمى ازايدى. كارانتين شارالارىنىڭ كۇشەيۋى قىزمەت كورسەتۋ سالاسىنا اسەر ەتىپ وتىر.

«دەگەنمەن بۇل كورسەتكىشتەردىڭ دە تۇراقتالا باستاعانىن كورىپ وتىرمىز. ون ايدىڭ قورىتىندىسى بويىنشا وڭىرلەر اراسىندا 9 ءوڭىر 5 نەگىزگى كورسەتكىش بويىنشا الەۋمەتتىك-ەكونوميكالىق ءوسىمدى قامتاماسىز ەتتى. ولار - اقمولا، تۇركىستان، الماتى، جامبىل، قوستاناي، ماڭعىستاۋ، پاۆلودار، سولتۇستىك قازاقستان وبلىستارى مەن شىمكەنت قالاسى. 5 وڭىردە 4 كورسەتكىش بويىنشا وڭ ديناميكا بايقالادى. ولار - اقتوبە، شىعىس قازاقستان، قاراعاندى وبلىستارى مەن نۇر-سۇلتان جانە الماتى قالالارى»، - دەدى ول.

پرەمەر- مينيستر وڭىرلەر جوسپارلانعان الەۋمەتتىك- ەكونوميكالىق كورسەتكىشتەرگە قول جەتكىزۋ جانە مەملەكەت باسشىسى بەلگىلەگەن مىندەتتەردى ءتيىمدى ىسكە اسىرۋ ءۇشىن بارلىق شارالاردى قابىلداۋى تيىستىگىن باسا ايتتى.

«قارجى مينيسترلىگىنە وڭىرلەرمەن بىرلەسىپ رەسپۋبليكالىق بيۋجەتتىڭ كىرىس بولىگى بويىنشا جوسپاردىڭ ورىندالۋىن قامتاماسىز ەتۋدى تاپسىرامىن. سونىمەن قاتار، مەملەكەتتىك ورگاندار مەن اكىمدىكتەرگە بيۋجەتتىك قاراجاتتى تولىعىمەن جانە ءتيىمدى يگەرۋدى قامتاماسىز ەتۋدى، جىلدىڭ سوڭىنا دەيىن باستالعان جوبالاردى اياقتاپ، جوسپارلانعان كورسەتكىشتەردى ورىنداۋدى تاپسىرامىن»، - دەدى اسقار مامين.