پرەمەر-مينيستر استىقتى ساتىپ الۋ مەن تاسىمالداۋعا قاتىستى تاپسىرما بەردى
نۇر-سۇلتان. قازاقپارات - بۇگىن ۇكىمەت وتىرىسىندا پرەمەر-مينيستر اسقار مامين استىقتى ساتىپ الۋ مەن تاسىمالداۋعا قاتىستى ءبىرقاتار تاپسىرما بەردى، دەپ حابارلايدى قازاقپارات ءتىلشىسى.
«اۋىل شارۋاشىلىعى مينيسترلىگىنە استىق جانە استىق بۇرشاق تۇقىمداس داقىلداردى وڭدەۋ سالاسىن، سونىمەن قاتار ەكسپورتتىق الەۋەتتى دامىتۋ جونىندەگى جول كارتاسىن ازىرلەۋدى تاپسىرامىن»، - دەدى ۇكىمەت باسشىسى.
بۇعان قوسا اسقار مامين اكىمدىكتەر مەن اۋىل شارۋاشىلىعى مينيسترلىگىنە ەگىن جيناۋدى قىسقا مەرزىمدە اياقتاپ، ەگىننىڭ ساقتالۋىن قامتاماسىز ەتۋى بويىنشا تاپسىرما بەردى.
«اۋىل شارۋاشىلىعى مينيسترلىگى استىقتىڭ ساتىپ الۋ باعاسىن بەلگىلەۋدى قامتاماسىز ەتسىن جانە نارىققا قاتىسۋشىلاردى حاباردار ەتسىن. اكىمدەرگە فورۆاردتىق ساتىپ الۋ مەحانيزمى ارقىلى قاراجاتتىڭ قايتىپ كەلۋىن قامتاماسىز ەتۋدى تاپسىرامىن»، - دەدى پرەمەر-مينيستر.
بۇدان بولەك، ۇكىمەت باسشىسى يندۋستريا مينيسترلىگىنە «قازاقستان تەمىر جولى» كومپانياسىمەن بىرلەسىپ، استىقتى ۇزدىكسىز تاسىمالداۋ ءۇشىن جىلجىمالى قۇراممەن قامتاماسىز ەتۋ شارالارىن قابىلداۋدى جۇكتەدى.
