ۇكىمەتتە جالپى ۇلتتىق ءىس-شارالار جوسپارىنىڭ جوباسى جاريالاندى
نۇر-سۇلتان. قازاقپارات - ۇكىمەتتە مەملەكەت باسشىسىنىڭ بيىلعى جولداۋىن ىسكە اسىرۋ بويىنشا جالپى ۇلتتىق ءىس-شارالار جوسپارىنىڭ جوباسى جاريالاندى، دەپ حابارلايدى قازاقپارات ءتىلشىسى.
ۇلتتىق ەكونوميكا ءمينيسترى رۋسلان دالەنوۆتىڭ ايتۋىنشا جوبا جاڭا ەكونوميكالىق باعداردىڭ 7 نەگىزگى قاعيداتىنا نەگىزدەلگەن جانە 10 باعىت بويىنشا 143 ءىس-شارادان تۇرادى.
«ءبىرىنشى باعىت: «مەملەكەتتىك باسقارۋدىڭ جاڭا ۇلگىسى». مەملەكەتتىك جوسپارلاۋ جۇيەسىن ودان ءارى جەتىلدىرۋ جوسپارلانىپ وتىر. ءتيىمدى كادر ساياساتى مەن شەشىمدەر قابىلداۋ جۇيەسى قامتاماسىز ەتىلەدى. مەملەكەتتىك ورگاندار قىزمەتىنىڭ تيىمدىلىگىن ودان ءارى ارتتىرۋ ماقساتىندا 2021 -جىلعى 1 شىلدەدەن باستاپ مەملەكەتتىك قىزمەتشىلەرگە ەڭبەكاقى تولەۋدىڭ جاڭا جۇيەسىنە كوشۋ جۇزەگە اسىرىلادى»، - دەدى ول.
ونىڭ ايتۋىنشا ەكونوميكاعا مەملەكەتتىڭ قاتىسۋىن ازايتۋ جونىندەگى شارالار جالعاسىن تابادى. بارلىعى 10 ءىس- شارانى ىسكە اسىرۋ جوسپارلانۋدا.
«ەكىنشى باعىت - «جاڭا جاعدايداعى ەكونوميكالىق دامۋ». بۇل باعىتتىڭ نەگىزگى باسىمدىعى - وڭدەۋشى ونەركاسىپتىڭ باسەكەگە قابىلەتتىلىگىن ارتتىرۋ جانە قازاقستاندىق قامتۋ ۇلەسى ۇلعايتۋ.
اگروونەركاسىپ كەشەنىنىڭ الەۋەتىن دامىتۋعا ەرەكشە نازار اۋدارىلاتىن بولادى. ەلدىڭ كولىك- ترانزيت سەكتورىن بەلسەندى دامىتۋ جالعاسادى. شاعىن جانە ورتا بيزنەستى، ونىڭ ىشىندە ەكونوميكانىڭ زارداپ شەككەن سەكتورلارىن قولداۋ جانە دامىتۋ جالعاستىرىلادى.
اقشا-كرەديت ساياساتى ماڭىزدى ىنتالاندىرۋشى ءرول اتقارادى. سالىق مىندەتتەمەلەرىن ورىنداۋدى وڭايلاتۋ جانە كولەڭكەلى ەكونوميكانى ازايتۋ بويىنشا جۇمىس جۇرگىزىلەدى. بۇل باعىتتا بارلىعى 42 ءىس-شارانى ىسكە اسىرۋ جوسپارلانۋدا»، - دەدى رۋسلان دالەنوۆ.
