سالوندار، شاشتارازدار، ويىن-ساۋىق ورتالىقتارى قاشان جۇمىسىن باستايتىنى بەلگىلى بولدى
«جالپى COVID-19 اۋرۋىن جۇقتىرۋ مەن ودان كەلەتىن ءولىم-ءجىتىم جاعدايىنىڭ ارى قاراي تۇراقتالۋى - ەكونوميكانىڭ بارلىق سەكتورىن تارتىپ، ۇيلەسە جۇمىس جۇرگىزۋگە بايلانىستى بولماق. اتاپ ايتقاندا تۇراقتاندىرۋ باعىتىنداعى قابىلدانعان شارالاردىڭ ناتيجەسىنىڭ 30 پايىزى عانا - مەديتسينالىق كومەك پەن ەپيدەميولوگيالىق شارالارعا بايلانىستى. ال قالعان 70 پايىزى جاپپاي ماسكا كيۋ رەجيمى مەن گيگيەناعا (30 پايىزى)، سونىمەن قاتار الەۋمەتتىك قاشىقتىقتى ساقتاۋعا (40 پايىزى) بايلانىستى»، - دەدى الەكسەي سوي ۇكىمەت وتىرىسىندا.
وسىلايشا مينيستر كارانتين اياقتالعاننان كەيىن، ياعني 3- تامىزدان باستاپ قانداي نىسانداردىڭ جۇمىس باستاۋىنا رۇقسات بەرىلەتىنىن ايتىپ ءوتتى. ول ءۇشىن تومەندەگى نىسانداردا سانيتارلىق- دەزينفەكتسيالىق رەجيم ساقتالىپ، ماسكا كيۋ مەن الەۋمەتتىك قاشىقتىقتى ساقتاۋ تالاپتارى ورىندالۋى كەرەك. بۇل نىساندار جۇمىسىن باستاۋ ءۇشىن اپتا ىشىندە ينفەكتسيانىڭ تارالۋ دەڭگەيى تۇراقتالىپ، توسەك ورىندار 70 پايىزعا بوساۋى ءتيىس.
«اتاپ ايتقاندا وسىنداي شارتتار ورىندالعان جاعدايدا ويىن-ساۋىق ورتالىقتارى، ساۋدا ۇيلەرى، ۋاقىتى مەن كۇنى شەكتەۋلى تارتىپتە ساۋدا جەلىلەرى، جابىق ازىق-تۇلىك نىساندارى مەن ازىق-تۇلىك ساتپايتىن بازارلار اشىلادى. سونداي-اق، بالالاردىڭ كوررەكتسيا كابينەتى، ءبىلىم بەرۋ ورتالىقتارى، بالالاردى دامىتۋ ورتالىقتارى، توپتىق ۇيىرمەلەر (بەس بالادان اسپاۋى كەرەك) جۇمىس باستايدى. بالالاردىڭ مەكتەپكە دەيىنگى مەكەمەلەرىنە دە كەزەكشى توپ رەجيمىندە جۇمىس ىستەۋگە رۇقسات. ءسان-سالوندارى، شاشتارازدار، كوسمەتيكالىق قىزمەت كورسەتەتىن ورتالىقتار مەن سالوندار، مانيكيۋرلار مەن پەديكيۋرلار (الدىن الا جازىلۋ بويىنشا) دا اشىلادى»، - دەدى ول.
الەكسەي سويدىڭ ايتۋىنشا مەملەكەتتىك قىزمەتشىلەر مەن كەڭسە قىزمەتكەرلەرىنىڭ 80 پايىزى قاشىقتان جۇمىس ىستەۋ ءتارتىبى ساقتالۋى ءتيىس.
