ىشكى ىستەر ءمينيسترى پرەزيدەنتكە ءدارى-دارمەكتى زاڭسىز ساتۋ فاكتىلەرى تۋرالى باياندادى

نۇر-سۇلتان. قازاقپارات - ىشكى ىستەر ءمينيسترى قازاقستان پرەزيدەنتىنە ءدارى-دارمەكتى زاڭسىز ساتۋدىڭ جولىن كەسۋ جانە كارانتين شارالارىن بۇزۋ فاكتىلەرى تۋرالى باياندادى، دەپ حابارلايدى قازاقپارات اقورداعا سىلتەمە جاساپ.

قاسىم-جومارت توقايەۆ كوروناۆيرۋس ىندەتىنىڭ تارالۋىنا قارسى كۇرەس ماسەلەلەرى جونىندە وتكەن سەلەكتورلىق كەڭەستە قۇقىق قورعاۋ، دەنساۋلىق ساقتاۋ جانە جەرگىلىكتى اتقارۋشى ورگاندار دارىلىك زاتتار مەن مەديتسينالىق قۇرال-جابدىقتاردى ساتۋ بويىنشا قۇقىق بۇزۋشىلىقتاردى انىقتاۋدا جانە ونىڭ جولىن كەسۋدە تۇراقتى تۇردە ۆەدومستۆوارالىق جۇمىس جۇرگىزۋ قاجەتتىگىن باسا ايتتى.

كەڭەستە ىشكى ىستەر ءمينيسترى ە. تۇرعىمبايەۆ ەسەپ بەرىپ، ءى ءى م دەنساۋلىق ساقتاۋ جانە جەرگىلىكتى اتقارۋشى ورگاندارمەن بىرلەسىپ، 18 مىڭنان استام رەيد جۇرگىزگەنى تۋرالى باياندادى.

كورسەتىلگەن كەزەڭدە بارلىعى 4000 نان استام كارانتيندى بۇزۋشىلار انىقتالىپ، شارا قولدانىلدى.

اتاپ ايتقاندا مۇنداي جاعداي الماتى قالاسىندا، اقمولا، تۇركىستان، الماتى جانە جامبىل وبلىستارىندا كوپ تىركەلدى. دارىلىك زاتتار مەن مەديتسينالىق ماقساتتاعى بۇيىمداردى زاڭسىز ساتۋدىڭ جولىن كەسۋ بويىنشا (5- شىلدەدەن باستاپ) ىشكى ىستەر ورگاندارى زاڭسىز اينالىمنان 65 مىڭنان استام قوراپ دارىلىك پرەپاراتتاردى، جارتى ميلليون مەديتسينالىق ماسكا مەن 36 مىڭ مەديتسينالىق بۇيىمدى تاركىلەگەن.

ولار قىمبات باعادا ساتىلعان. سونداي-اق ىشكى ىستەر ورگاندارى دارىلىك زاتتاردى زاڭسىز ساتۋدىڭ 348 فاكتىسىنىڭ جولىن كەستى. پوليتسياعا 284 ادام جەتكىزىلدى، ونىڭ 138 ءسى مەديتسينا سالاسىنىڭ قىزمەتكەرلەرى.

ءدارى-دارمەكتىڭ كوپ كولەمى نۇر-سۇلتان، الماتى، شىمكەنت، قاراعاندى جانە اتىراۋ قالالارىندا الىندى.

الىنعان مەديتسينالىق پرەپاراتتار اۋماقتىق دەنساۋلىق ساقتاۋ ورگاندارىنا بەرىلەدى. سونىمەن قاتار ە. تۇرعىمبايەۆ ىشكى ىستەر ورگاندارى جۇرگىزىپ جاتقان قوعامدىق ءتارتىپتى ساقتاۋ جانە قولدانىستاعى شەكتەۋ شارالارىن قامتاماسىز ەتۋ جۇمىستارى تۋرالى باياندادى.

بۇل مىندەتتەردى ورىنداۋ ءۇشىن كۇندەلىكتى 13000 پوليتسەي، ۇلتتىق ۇلاننىڭ اسكەري قىزمەتشىلەرى جانە 1000 ەرىكتى جۇمىس ىستەۋدە. 4 وبلىستا 2 سانيتاريالىق جانە 9 بلوكبەكەت قويىلدى. 241 جۇقتىرۋ وشاعى مەن 366 كارانتيندىك نىسان قورشاۋعا الىندى.

كەڭەس قورىتىندىسى بويىنشا، پرەزيدەنت ىشكى ىستەر ورگاندارى بۇل باعىتتاعى جۇمىستى جالعاستىراتىنىن، ال، كىنالىلەر زاڭناماعا سايكەس جازالاناتىنىن اتاپ ءوتتى.

بۇل تاپسىرمانىڭ ىسكە اسىرىلۋىن باقىلاۋ ق ر پرەزيدەنتى اكىمشىلىگىنىڭ ۇيلەستىرۋمەن قاۋىپسىزدىك كەڭەسىنىڭ اپپاراتىنا جۇكتەلدى.