ۇلتتىق بانك الماتىدان ەلورداعا كوشتى

الماتى. قازاقپارات - قازاقستان ۇلتتىق بانكى نۇر-سۇلتان قالاسىنا كوشىرىلدى، دەپ حابارلايدى قازاقپارات.

«ق ر پرەزيدەنتى قاسىم-جومارت توقايەۆتىڭ 2020-جىلعى 10- ساۋىردەگى 304№ جارلىعىنا سايكەس، قازاقستان ۇلتتىق بانكى 2020-جىلدىڭ 1- شىلدەسىنە دەيىن استاناعا كوشىرىلدى. ۇلتتىق بانكتىڭ جاڭا مەكەنجايى - نۇر-سۇلتان قالاسى، ماڭگىلىك ەل كوشەسى، 57 ا»، - دەپ حابارلادى ۇلتتىق بانكتىڭ باسپا ءسوز قىزمەتىنەن.

مەملەكەت باسشىسىنىڭ تاپسىرماسىمەن، قازاقستاننىڭ قارجى ورتالىعى - الماتى قالاسىنداعى ايتەكە ءبي، 67 مەكەنجايىندا ۇلتتىق بانكتىڭ تۇراقتى وكىلدىگى اشىلدى.

ونىڭ باسشىسى - ۇلتتىق بانك ءتوراعاسىنىڭ ورىنباسارى دينا عاليەۆا. وكىلدىك ق ر قارجى نارىعىن رەتتەۋ جانە دامىتۋ اگەنتتىگى، قازاقستان قارجىگەرلەرى قاۋىمداستىعى، قارجى نارىعىنىڭ سۋبەكتىلەرى جانە حالىقارالىق قارجى ينستيتۋتتارىمەن تىعىز ءوزارا ارەكەتتەستىكتى جالعاستىرادى.