مينيستر شەتەلدەگى قانداستاردى قولداۋ شارالارى تۋرالى ايتتى

نۇر- سۇلتان. قازاقپارات - بۇگىن پارلامەنت سەناتىنىڭ جالپى وتىرىسىندا اقپارات جانە قوعامدىق دامۋ ءمينيسترى ايدا بالايەۆا شەتەلدەگى قانداستاردى قولداۋ شارالارى تۋرالى ايتتى، دەپ حابارلايدى قازاقپارات ءتىلشىسى.

«قانداستاردى، شەتەلدەگى وتانداستارىمىزدى قولداۋ - مەملەكەتتىك ساياساتتىڭ باسىم باعىتتارىنىڭ ءبىرى. اتاجۇرتقا ورالعان قانداستارىمىز كوپ. بۇل ماقساتتا جۇيەلى جۇمىستار لەگى جۇرگىزىلىپ جاتىر. 2018 -جىلى «وتانداستار» قورى قۇرىلدى. قور قازىرگى تاڭدا بەلسەندى تۇردە جۇمىسىن جالعاستىرۋدا»، - دەدى ايدا بالايەۆا پارلامەنت سەناتىنىڭ وتىرىسىندا.

مينيستر كەيىنگى ءبىر جارىم جىلدىڭ ىشىندە قانداستارىمىزدىڭ قولداۋ ماقساتىندا 3 مىڭعا تارتا شارا وتكىزىلگەنىن جەتكىزدى.

«بالالار لاگەرى ۇيىمداستىرىلىپ، قازاق ءتىلىن ۇيرەنۋ كۋرستارى باستالدى. ادىستەمەلىك قۇرالدار ازىرلەندى. الەمدەگى 12 مەملەكەتتىڭ 23 قالاسىندا قازاق ءتىلىن ۇيرەتۋگە ارنالعان 31 ونلاين- سىنىپ اشىلدى. ولار قازىر بەلسەندى جۇمىس جۇرگىزىپ جاتىر. شەتەلدەگى 250 قازاق ورتالىعىمەن ىنتىماقتاستىق ورناتىلدى. بۇل جۇمىس جۇيەلى تۇردە جالعاسىن تابادى»، - دەدى ايدا بالايەۆا.

بۇدان بولەك مينيستر شەتەلدەگى قانداستاردى قولداۋعا باعىتتالعان 2021-2025 -جىلدارعا ارنالعان باعدارلاما ازىرلەنگەنىن جەتكىزدى. ءوز كەزەگىندە پارلامەنت سەناتىنىڭ ءتوراعاسى ماۋلەن اشىمبايەۆ قانداستاردىڭ ماسەلەسىن ەرەكشە نازار اۋدارۋ كەرەكتىگىن ايتىپ ءوتتى.

«ازاماتتىق الۋ ءۇشىن قۇجاتتاردىڭ ءتىزىمىن ازايتۋ جانە وسى ءراسىمدى جەڭىلدەتۋ ماسەلەسى بار. بۇگىنگى كۇنى قانداستارىمىز بۇل جۇمىستارمەن باسى قاتىپ جارتى، ءتىپتى ءبىر جىلعا دەيىن جۇرەدى. انا جاقتان، مىنا جاقتان قاعازداردى جيناۋ كەرەك دەپ، اۋرە- سارساڭعا تۇسەدى. قانداستارىمىز وسى ءراسىمدى جەڭىلدەتۋ ماسەلەسىن ءجيى كوتەرەدى. بۇل جەردە دە ۇكىمەت تاراپىنان ءبىر جۇمىستاردىڭ باستالعانىن بىلەمىز. ناقتى ناتيجە بولار دەپ ۇمىتتەنەمىز»، - دەدى ول.

اۆتور: ايان بەكەن ۇلى