ەكولوگيا ءمينيسترى ەلدەگى سۋ پروبلەمالارىن كوتەردى

نۇر- سۇلتان. قازاقپارات - ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ الداعى ۋاقىتتا ەلدى سۋمەن قامتاماسىز ەتۋدە كەزدەسۋى مۇمكىن نەگىزگى پروبلەمالاردى اتادى، دەپ حابارلايدى قازاقپارات ءتىلشىسى.

«قازىرگى ۋاقىتتا ەلدەگى سۋمەن قامتاماسىز ەتۋ جاعدايى ەكونوميكا سالالارى مەن حالىقتىڭ تالاپتارىن قاناعاتتاندىرىپ وتىر. الايدا سۋ سالاسىنىڭ مىناداي نەگىزگى تۇيتكىلدەرىن اتاپ وتۋگە بولادى. بىرىنشىدەن - وزەن اعىنىنىڭ قۇلاۋى مەن سۋدى تۇتىنۋ كولەمىنىڭ ءوسۋى سالدارىنان ورتا جانە ۇزاق مەرزىمدى كەزەڭدە ەلدى سۋمەن قامتاماسىز ەتۋدىڭ بولجامى تومەندەۋدە. ەكىنشىدەن - ارنالاردىڭ جانە يرريگاتسيالىق جۇيەلەردىڭ سىندارلى توزۋى سالدارىنان تاسىمالداۋ كەزىندەگى سۋدىڭ جوعارى شىعىنى. اتاپ ايتقاندا، اۋىل شارۋاشىلىعىندا شىعىندار % 50- عا دەيىن جەتەدى. ولاردى قىسقارتۋ ءۇشىن ارنالاردى جوندەۋ مەن سۋ رەسۋرستارىن اۆتوماتتى باسقارۋدى ەنگىزۋ تالاپ ەتىلەدى. كەلەسى - ينفراقۇرىلىمعا تارتىلاتىن ينۆەستيتسيالاردىڭ جانە بىلىكتى كادرلاردىڭ جەتىسپەۋشىلىگى»، - دەدى ماعزۇم مىرزاعاليەۆ و ك ق وتكەن حالىققا ەسەپ بەرۋ كەزدەسۋىندە.

وسىعان بايلانىستى، مينيسترلىكتىڭ الدىندا 2030 -جىلى قوسىمشا جەر ءۇستى سۋ رەسۋرستارىن ۇلعايتۋ ەسەبىنەن 100 شاقىرىم دەڭگەيىندە سۋ بالانسىن ساقتاۋ، سۋارمالى جەرلەردى 1,4-تەن 3,0 ميلليون گ ا- عا دەيىن ۇلعايتۋ ءۇشىن جاڭا يرريگاتسيالىق جۇيەلەردى سالۋ، سۋ شارۋاشىلىعى ينفراقۇرىلىمىن جاڭعىرتۋ جانە قايتا جاڭارتۋ، سۋ سالاسىن تسيفرلاندىرۋ، سۋ ۇنەمدەۋ مىندەتتەرى تۇر.

«جەردى سۋلاندىرۋ بويىنشا كەلەسى جۇمىستار اتقارىلدى. 2019 -جىلى 66 مىڭ گ ا القاپتا سۋ شارۋاشىلىعى ينفراقۇرىلىمى قالپىنا كەلتىرىلدى. سونداي- اق، ەلىمىزدىڭ 5 وڭىرىندە (الماتى، جامبىل، تۇركىستان، قىزىلوردا جانە اقتوبە وبلىستارى) سۋارمالى جەرلەردىڭ شامامەن 0,5 ميلليون گ ا (492 مىڭ گا) سۋمەن قامتاماسىز ەتىلۋىن ارتتىرۋ جانە قالپىنا كەلتىرۋ بويىنشا ءتيىستى جوبالار ىسكە اسىرىلۋدا. قارىز جانە بيۋدجەت قاراجاتى ەسەبىنەن قارجىلاندىرۋدىڭ جالپى سوماسى - 274 ميلليارد تەڭگە جالپى 3 جىل ىشىندە ءبىز 6,7 مىڭ شاقىرىمنان استام ارنالار، 4 سۋ قويماسى، 4 سۋ تورابى، 239 تىك درەناج ۇڭعىماسى جانە 23 مىڭ وزگە دە سۋ شارۋاشىلىعى قۇرىلىستارىن قايتا جاڭعىرتاتىن بولامىز»، - دەدى ول.

ءمينيستردىڭ ايتۋىنشا، وسىنىڭ ارقاسىندا 88 مىڭ جۇمىس ورنى، ونىڭ ىشىندە قۇرىلىس كەزەڭىندە 11 مىڭ جۇمىس ورنى اشىلاتىنىن ايتادى. قالپىنا كەلتىرىلگەن سۋارمالى جەرلەردى اينالىمعا ەنگىزۋ اۋىلدا 77 مىڭ تۇراقتى جۇمىس ورنىن اشۋعا ىقپال ەتپەك.

اۆتور: ايان بەكەن ۇلى