16:47, 20 - مامىر 2020 | GMT +5
مەملەكەت باسشىسى رەسەيدىڭ قازاقستانداعى ەلشىسىن قابىلدادى
نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ رەسەي فەدەراتسياسىنىڭ قازاقستانداعى ەلشىسى الەكسەي بوروداۆكيندى قابىلدادى، دەپ حابارلايدى اقوردا.
كەزدەسۋ بارىسىندا قازاقستان مەن رەسەي اراسىنداعى جان- جاقتى ستراتەگيالىق سەرىكتەستىكتىڭ قازىرگى احۋالى مەن پەرسپەكتيۆالارى تالقىلاندى. ساۋدا- ەكونوميكالىق، ينۆەستيتسيالىق جانە مادەني- گۋمانيتارلىق ىنتىماقتاستىقتى دامىتۋعا ەرەكشە ءمان بەرىلدى.
قازاقستان پرەزيدەنتى كوروناۆيرۋس پاندەمياسى كەزىندەگى ىقپالداستىقتى ەكىجاقتى فورماتتا، سونداي- اق، ەۋرازيالىق ەكونوميكالىق وداق اياسىندا ودان ءارى نىعايتۋدىڭ ماڭىزدىلىعىن اتاپ ءوتتى. تاراپتار بيىلعى قاراشا ايىنا جوسپارلانعان ءوڭىرارالىق ىنتىماقتاستىقتىڭ XVII فورۋمىنا دايىندىق بارىسىن قاراستىردى. مەملەكەت باسشىسى اتالعان ءىس- شارانىڭ ساپالى ءارى مازمۇندى بولۋىن قامتاماسىز ەتۋ قاجەتتىگىنە نازار اۋداردى. سونىمەن قاتار كەزدەسۋدە وڭىرلىك جانە حالىقارالىق كۇن تارتىبىندەگى وزەكتى ماسەلەلەر تالقىلاندى.
