قازاقستاندا باسپانا باعاسى ءبىر جىلدا قالاي وزگەردى؟

نۇر-سۇلتان. قازاقپارات - ق ر ۇلتتىق ەكونوميكا مينيسترلىگى ستاتيستيكا كوميتەتى تۇرعىن ءۇي نارىعىندا باعالار قالاي وزگەرگەنىن ءمالىم ەتتى، دەپ حابارلايدى قازاقپارات.

ستاتيستيكا كوميتەتىنىڭ مالىمەتىنە سايكەس، 2020-جىلعى ساۋىردە ونىڭ الدىڭعى ايمەن سالىستىرعاندا جاڭا تۇرعىن ۇيلەردى ساتۋ، اباتتاندىرىلعان جانە اباتتاندىرىلماعان باسپانانى ساتۋ- ساتىپ الۋ باعالارى وزگەرىسسىز قالدى.

اباتتاندىرىلعان پاتەردى جالعا الۋ تولەمى %0,8 جوعارى بولدى. ال ءبىر جىلدا تۇرعىن ءۇي نارىعىندا باعا كەلەسىدەي وزگەرگەن:

بيىلعى ءساۋىر ايىندا تازا ارلەنگەن جاڭا تۇرعىن ءۇيدىڭ ءبىر شارشى مەترى 297170 تەڭگەنى (رەسپۋبليكا بويىنشا ورتاشا باعا) قۇرادى.

بۇل 2019-جىلدىڭ ساۋىرىمەن سالىستىرعاندا 6,3 پايىزعا قىمبات. بيىلعى ساۋىردە اباتتاندىرىلعان پاتەردىڭ ءبىر شارشى مەترىنىڭ قۇنى 206072 تەڭگەگە باعالاندى.

ءبىر جىلدا باعا 7 پايىزعا ارتقان. اباتتاندىرىلماعان، جەر ءۇيدىڭ ءبىر شارشى مەترىنىڭ باعاسى وتكەن ءساۋىر ايىندا 128097 تەڭگە بولدى.

2019-جىلدىڭ ساۋىرىمەن سالىستىرعاندا 6,5 پايىزعا جوعارى. كوپ قاباتتى ۇيدە پاتەردى جالعا الۋ تولەمى ءبىر شارشى مەترى ءۇشىن 1574 تەڭگەنى قۇرادى. باعا ءبىر جىلدا 8,8 پايىزعا وسكەن.