دەپۋتاتتار شالعاي اۋداندارعا بارۋى كەرەك - ەلباسى
نۇر- سۇلتان. قازاقپارات – ق ر تۇڭعىش پرەزيدەنتىنىڭ توراعالىعىمەن «Nur Otan» پارتياسى ساياسي كەڭەسى بيۋروسىنىڭ وتىرىسى ءوتتى، دەپ حابارلايدى قازاقپارات Elbasy.kz سايتىنا سىلتەمە جاساپ.
ءماجىلىس بارىسىندا 18 - ناۋرىزدا وتەتىن پارتيانىڭ ساياسي كەڭەسى وتىرىسىنىڭ كۇن ءتارتىبى تالقىلاندى.
ەلباسى بيۋرو وتىرىسىن اشىپ، پارتيانىڭ قايتا جاڭعىرۋ باعدارلاماسى مەن «باقىتتى وتباسى»، «ارداگەرلەردى ارداقتايىق»، «كەدەرگىسىز كەلەشەك» الەۋمەتتىك جوبالارىن جۇزەگە اسىرۋ بارىسىن ماقۇلدادى.
سونىمەن بىرگە نۇرسۇلتان نازاربايەۆ ەل وڭىرلەرىندەگى پارتيا جۇمىسىنا نازار اۋداردى.
«پارتيا باسشىلىعى، ءماجىلىس پەن ءماسليحات دەپۋتاتتارى وڭىرلەرگە، سونىڭ ىشىندە شالعاي اۋداندارعا بارۋى كەرەك. حالىقپەن كەزدەسىڭىزدەر، ماسەلەلەرىن شەشىڭىزدەر. بارلىق وسى ماسەلەلەر ايماقتىق پارتيا باعدارلامالارىندا كورىنىس تابۋى ءتيىس»، - دەدى پارتيا ءتوراعاسى.
سونىمەن بىرگە، بيۋرو وتىرىسىندا 30 - ناۋرىز بەن 16- مامىر ارالىعىندا پارتيانىڭ ىشكى ىرىكتەۋىن وتكىزۋ تۋرالى شەشىم قابىلداندى.
«مۇنى وتە دۇرىس شارا دەپ ەسەپتەيمىن، بۇل پارتيانىڭ اتىنان وزەكتى ماسەلەلەردى شەشەتىن ەڭ بەلسەندى جانە سەنىمدى مۇشەلەردى انىقتاۋعا مۇمكىندىك بەرەدى»، - دەدى ەلباسى.
وتىرىس قورىتىندىسى بويىنشا ىشكى ىرىكتەۋدى جۇرگىزۋ ەرەجەسىنىڭ جوباسىن الدىن الا ماقۇلداۋ جونىندە بيۋرو قارارى قابىلداندى. ساياسي كەڭەستىڭ وتىرىسىندا جوبا بەكىتىلەدى.
سونىمەن بىرگە، وتىرىستا پارتيانىڭ سىبايلاس جەمقورلىققا قارسى 2025 -جىلعا دەيىنگى باعدارلاماسىن جۇزەگە اسىرۋدىڭ جول كارتاسى بەكىتىلدى.
اۆتور: ايجان سەرىكجان قىزى
