قازاقستان كوروناۆيرۋس قاۋپى جوعارى ءبىرىنشى ساناتتاعى ەلدەردىڭ ءتىزىمىن كەڭەيتتى
بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى، دەپ حابارلايدى قازاقپارات ءتىلشىسى.
«وسى جىلدىڭ 1 - ناۋرىزىنان باستاپ دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋدى كۇشەيتۋدىڭ 4- ساتىسىن ەنگىزدى. ءبىرىنشى ساناتتاعى ەلدەر قاتارىنا قىتاي حالىق رەسپۋبليكاسى، سونىڭ ىشىندە گونكونگ، تايۆان، ماكاو جانە يران، وڭتۇستىك كورەيا، جاپونيا، يتاليا جاتادى»، - دەدى مينيستر.
ەلجان ءبىرتانوۆ قىتاي مەن يراننان كەلگەن ازاماتتار مىندەتتى تۇردە 14 كۇندىك كارانتينگە جاتقىزىلاتىنىن، اۋرۋحانادان شىققاننان كەيىن قوسىمشا 10 كۇن ىشىندە مەديتسينالىق باقىلاۋدا بولاتىنىن مالىمدەدى.
«ءبىرىنشى ساناتتا ەلدەردەن كەلگەن ازاماتتار 14 كۇنگە تۇرعىلىقتى جەرى بويىنشا كارانتينگە ورنالاستىرىلادى. ءبىراق سانيتارلىق قىزمەتتىڭ شەشىمى بويىنشا بۇل ادامدار مەديتسينالىق ۇيىمداعى كارانتينگە اۋىستىرىلۋى مۇمكىن»، - دەدى ول.
