توقايەۆ قورداي اۋدانىنداعى دۇنگەن دياسپوراسىنىڭ وكىلدەرىمەن كەزدەستى
مەملەكەت باسشىسى سورتوبە اۋىلىنداعى مادەنيەت ۇيىندە دۇنگەن دياسپوراسىنىڭ وكىلدەرىمەن كەزدەسۋ وتكىزدى.
پرەزيدەنت قازاقستاندى دوستىقتىڭ، بەيبىتشىلىك پەن كەلىسىمنىڭ، سونداي-اق، بارلىق ەتنيكالىق توپتاردىڭ ورتاق وتانى بولىپ سانالاتىنىن اتاپ ءوتتى. ەلىمىز ءتۇرلى تاريحي جاعدايلارعا بايلانىستى، قيىن-قىستاۋ زاماندا ءماجبۇرلى تۇردە قازاق جەرىن پانالاپ كەلگەن حالىقتىڭ ءبارىن قۇشاق جايا قارسى العانىن ايتتى. مەملەكەت باسشىسى قورداي اۋدانىندا بولعان وقيعادان دۇرىس قورىتىندى شىعارۋ كەرەك ەكەنىن مالىمدەدى.
- بولعان قايعىلى وقيعا ارتتا قالۋى ءتيىس. الداعى ۋاقىتتا تاتۋ-ءتاتتى، تۇسىنىستىكتە بىرگە ءومىر سۇرەمىز. ءبىز بۇدان ساباق الۋىمىز كەرەك. بۇرىن-سوڭدى مۇنداي جاعداي بولعان ەمەس. بۇل بيلىكتىڭ دە جىبەرگەن كەمشىلىگى. سوندىقتان مەن بىردەن وبلىس باسشىلىعىن، سونىڭ ىشىندە قۇقىق قورعاۋ ورگاندارىنىڭ جەتەكشىلەرىن دە اۋىستىردىم، - دەدى مەملەكەت باسشىسى.
قاسىم-جومارت توقايەۆ بەردىبەك ساپاربايەۆ ءتوراعالىق ەتەتىن ۇكىمەتتىك كوميسسيا بارلىق نىسانداردى قايتا قالپىنا كەلتىرىپ، الەۋمەتتىك ماسەلەلەردى شەشۋمەن اينالىساتىنىن ايتتى. ايماقتاعى احۋال ءجىتى باقىلاۋدا بولادى.
پرەزيدەنت دۇنگەن دياسپوراسىنىڭ وكىلدەرىن جاستاردىڭ تاربيەسىنە باسا ءمان بەرىپ، ولاردى ءاربىر حالىقتىڭ مادەنيەتىنە، قازاق ءتىلى مەن قازاقستاننىڭ مەملەكەتتىك رامىزدەرىنە قۇرمەتپەن قاراۋعا شاقىردى.
- سىزدەردىڭ بالالارىڭىز قازاق ءتىلىن ۇيرەنۋى كەرەك. سونداي-اق ورىس ءتىلى مەن ءوزىنىڭ انا ءتىلىن دە ءبىلۋى قاجەت. مەملەكەت سىزدەردىڭ مادەنيەتتەرىڭىز بەن داستۇرلەرىڭىزدى ساقتاپ، دامىتۋعا جان-جاقتى قولداۋ كورسەتەدى. دەگەنمەن سىزدەر، اسىرەسە، اۋىلدا تۇراتىن ازاماتتار مەملەكەتتىك ءتىلدى بىلگەندەرىڭىز اسا ماڭىزدى، - دەدى مەملەكەت باسشىسى.
سونىمەن قاتار پرەزيدەنت جاستاردىڭ قورداي اۋدانىنداعى بىرنەشە اۋىلدا عانا ەمەس، قازاقستاننىڭ بارلىق وڭىرىندە جۇمىس ىستەۋىنە مول مۇمكىندىك بار ەكەنىن جەتكىزدى.
- قازاقستان - بايتاق ءارى باي مەملەكەت. ەلىمىزدىڭ سولتۇستىگىندە قۇنارلى جەرلەر بار. ءبىز نەگە ءبىر جەردە عانا تۇراقتاۋىمىز كەرەك؟ بالالارىڭىزدى سولتۇستىككە، شىعىسقا قاراي جىبەرىڭىزدەر. سولتۇستىك، باتىس، وڭتۇستىك، شىعىستا سىزدەردىڭ بالالارىڭىزعا جۇمىس ىستەپ، اقشا تابۋعا مۇمكىندىك مول، - دەدى قاسىم-جومارت توقايەۆ.
مەملەكەت باسشىسى جۇرتشىلىقتى قايعىلى وقيعانىڭ قايتالانۋىنا جول بەرمەۋگە شاقىردى. وڭىردەگى قۇقىق قورعاۋ ورگاندارىنىڭ جاڭا باسشىلىعىنا قوعامدىق ءتارتىپ پەن تۇرعىنداردىڭ قاۋىپسىزدىگىن قامتاماسىز ەتۋ، سونداي-اق، قىلمىستىڭ الدىن الۋ جونىندە مىندەت جۇكتەدى.
كەزدەسۋدە قورداي اۋدانىنىڭ قۇرمەتتى ازاماتى شيسىر دينلاسون كەزىندە قامقورلىق كورسەتكەن قازاق حالقىنا قوناقجايلىلىعى مەن مەيىرىمى ءۇشىن العىس ءبىلدىردى.
ەڭبەك ارداگەرى جەرگىلىكتى دۇنگەندەردىڭ بولعان وقيعاعا وكىنىش ءبىلدىرىپ، كەشىرىم سۇرايتىنىن ايتتى. سورتوبە اۋىلدىق مەكتەبىنىڭ قازاق ءتىلى مەن ادەبيەتى ءپانىنىڭ مۇعالىمى ەديك سۋلاروۆ جەرگىلىكتى بالالارعا مەملەكەتتىك ءتىلدى، قازاقستان تاريحىن، قازاق حالقىنىڭ سالت-ءداستۇرىن وقىتۋعا نيەتتى ەكەنىن جەتكىزدى.
كەزدەسۋ سوڭىندا قازاقستان پرەزيدەنتى قاراكەمەر، ماسانشى جانە سورتوبە اۋىلدارىنداعى قوعامدىق ءتارتىپتى قامتاماسىز ەتەتىن ارنايى جەدەل ارەكەت ەتۋ جاساعىنىڭ جاۋىنگەرلەرىمەن، ۇلتتىق گۆارديانىڭ اسكەري قىزمەتشىلەرىمەن اڭگىمەلەستى.
