ق ر پرەزيدەنتى قازاقستاندىقتاردى العىس ايتۋ كۇنىمەن قۇتتىقتادى
مەملەكەت باسشىسىنىڭ العىس ايتۋ كۇنىمەن قۇتتىقتاۋى
قۇرمەتتى قازاقستاندىقتار! بارشاڭىزدى العىس ايتۋ كۇنىمەن شىن جۇرەكتەن قۇتتىقتايمىن! ەلباسى بەلگىلەگەن بۇل مەيرام - ءوزارا قۇرمەت پەن سەنىمنىڭ، مەيىرىم مەن ىزگىلىكتىڭ مەرەكەسى. قازاق جۇرتى قيىن- قىستاۋ كەزەڭدە امالسىز قونىس اۋدارعان ميلليونداعان ادامنىڭ قۇتتى مەكەنىنە اينالدى. ولاردىڭ وزدەرى دە، ۇرپاقتارى دا جەرىمىزدەن پانا تاۋىپ، ءوسىپ- ءونىپ، قازاقستاننىڭ دامۋىنا زور ۇلەس قوستى. بۇل كۇنى ءبىز ەلدى وركەندەتەتىن تاتۋ تىرشىلىك پەن جاراسىمدى سىيلاستىق جولىنداعى نيەتىمىزدىڭ توعىسقانى ءۇشىن ءبىر- بىرىمىزگە العىس ايتامىز. تاۋەلسىزدىك كەزەڭىندەگى تابىستارعا بەرەكە- بىرلىكتىڭ ارقاسىندا عانا قول جەتكىزدىك. بۇل - ەگەمەن ەلىمىزدىڭ باعا جەتپەس بايلىعى. سوندىقتان بۇل قاستەرلى قۇندىلىقتار ءاردايىم اينىماس تەمىرقازىعىمىز بولىپ قالا بەرەدى. ىشكى ساياسي تۇراقتىلىق - ءاربىر قازاقستاندىقتىڭ زور جاۋاپكەرشىلىك پەن بەلسەندىلىك تانىتۋىنىڭ ناتيجەسى. ەلىمىزدىڭ بارلىق ازاماتتارىنا قازاقستاندى دامىتۋعا قوسقان ولشەۋسىز ۇلەسى ءۇشىن شىنايى ريزاشىلىعىمدى بىلدىرەمىن. ءار وتباسىنا اماندىق پەن يگىلىك تىلەيمىن!
