سولتۇستىك قازاقستاندىق جاستارعا بىردەن قوس ديپلوم الۋعا مۇمكىندىك بار

پەتروپاۆل. قازاقپارات - سولتۇستىك قازاقستان وبلىسىنىڭ ستۋدەنتتەرى ەكى جوعارى وقۋ ورنى اراسىنداعى كەلىسىمنەن كەيىن بىردەن قوس ديپلوم الۋعا مۇمكىندىك الدى، دەپ حابارلايدى قازاقپارات ءتىلشىسى.

م. قوزىبايەۆ اتىنداعى سولتۇستىك قازاقستان مەملەكەتتىك ۋنيۆەرسيتەتى رەسەيدىڭ ساحا رەسپۋبليكاسىنان كەلگەن مەيمانداردى قابىلداپ، ءوزارا كەلىسىمگە وتىردى. ياكۋت مەملەكەتتىك اۋىل شارۋاشىلىعى اكادەمياسى جەرگىلىكتى جوعارى وقۋ ورنىمەن ءۇش جىلدان بەرى ارىپتەستىك ورناتقان. ەندى ەكى جاققا ءتيىمدى «قوس ديپلوم» باعدارلاماسىن جۇزەگە اسىرماق.

«ەكى جوعارى وقۋ ورنى اراسىنداعى ارىپتەستىكتى جاڭا دەڭگەيگە شىعارۋدى ماقسات ەتتىك. سولتۇستىك قازاقستان - اگرارلى ولكە. سول سەبەپتى مۇندا اۋىل شارۋاشىلىعىنا قاجەت جوعارى بىلىكتى مامانداردى ازىرلەۋگە باسىمدىق بەرىلەدى. ولار اگروونەركاسىپتىك كەشەندەگى جاڭا تەحنولوگيالاردى مەڭگەرىپ شىعادى. كەلىسىم اياسىندا سىزدەرمەن تاجىريبە الماسۋ مۇمكىندىگى ارتا تۇسەدى»، - دەدى دەلەگاتسيانى باستاپ كەلگەن ياكۋت مەملەكەتتىك اۋىلشارۋاشىلىعى اكادەمياسىنىڭ رەكتورى يۆان سلەپتسوۆ.

ياكۋت مەملەكەتتىك اۋىل شارۋاشىلىعى اكادەمياسى - رەسەيدىڭ سولتۇستىك-شىعىس اۋماعىنداعى بەس ءوڭىردى قامتيتىن نەگىزگى جوعارى وقۋ ورىندارىنىڭ ءبىرى. ساحا رەسپۋبليكاسى 200 مىڭنان استام جىلقى جانە وسىنداي كولەمدە بۇعى وسىرۋمەن اينالىسادى. مال شارۋاشىلىعىنا قاتىستى عىلىمي بازا جاقسى دامىعان. وقۋ ورنى بيىل سولتۇستىك قازاقستاندىق 5 ابيتۋريەنتكە ۆەتەرينار ماماندىعى بويىنشا بيۋجەتتىك ورىن ۇسىنباق.

قازىرگى ۋاقىتتا اكادەميالىق ۇتقىرلىق بويىنشا ياكۋتيادا م. قوزىبايەۆ اتىنداعى س ق م ۋ- ءنىڭ ەكى ستۋدەنتى ءبىلىم الىپ جاتىر. ولارعا اي سايىن 5 مىڭ رۋبل ستيپەنديا دا تولەنەدى. رەسەيلىك جاستار پەتروپاۆلدا ءبىلىم الادى. ەكى جاقتىڭ وقىتۋشىلارى دا الما- كەزەك شەتەلگە شىعىپ ءدارىس وقىپ، تاجىريبە الماسىپ تۇرادى.

ەندى س ق م ۋ ستۋدەنتتەرىنە قوس ديپلوم الىپ شىعۋعا مۇمكىندىك بار. جاڭا باعدارلاما بويىنشا ماگيسترانتتار دا وقي الادى. تەرەڭ ءبىلىم الىپ، قازاقستاندىق جانە رەسەيلىك كومپانيالاردا تاجىريبە جيناقتايدى. ناتيجەسىندە ق ر جانە ر ف جوعارى ءبىلىم تۋرالى مەملەكەتتىك ديپلومىن الىپ شىعادى.