ەلجان ءبىرتانوۆ زايسانداعى احۋالعا قاتىستى پىكىر ءبىلدىردى

نۇر-سۇلتان. قازاقپارات - دەنساۋلىق ساقتاۋ ءمينيسترى ەلجان ءبىرتانوۆ شۋ شىققان زايسانداعى جاعدايعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«پويىز ارقىلى اۋىر جۇك كولىگى ءالى توقتاتىلماعان. ونى قالاي توقتاتامىز؟ ول كۇندەلىكتى ءجۇرىپ جاتقان تاۋارلار. ونىڭ اراسىندا ەلىمىزگە كەلىپ جاتقان ترانزيتتىك تاۋارلار دا بار. سول كولىكتەر ارقىلى شەكارانى كەسىپ وتكەن جۇرگىزۋشىلەرى شىعىس قازاقستانداعى باقتى جانە مايقاپشاعاي بەكەتى ارقىلى كەلەدى. ودان بولەك تەمىرجول ارقىلى وتەتىن پۋنكتەر بار. ءبىز كۇندەلىكتى مونيتورينگ جاسايمىز. ءبىزدىڭ سانيتارلىق دارىگەر سول جەردە تۇرادى. تەپلوۆيزورلار بىزدە بار. رەزەرۆتەن الىنعان اقشا بويىنشا قوسىمشا تەپلوۆيزور الۋعا قازىر تىرىسىپ جاتىرمىز»، - دەدى ەلجان ءبىرتانوۆ ەلوردادا وتكەن باسپا ءسوز ءماسليحاتىندا.

ءمينيستردىڭ ايتۋىنا قاراعاندا، شەكارادان وتكەن بارلىق جۇرگىزۋشىگە باقىلاۋ جۇرگىزۋ كەرەك.

«مىسالى ءبىزدىڭ اقپارات بويىنشا قىتايدا بيزنەسپەن، ساۋدامەن اينالىساتىن بىرنەشە قازاقستان ازاماتى بار. ولار ەلگە قايتۋى كەرەك. ولارعا ءبىز مۇمكىندىك بەرۋىمىز كەرەك. ارينە تاۋەكەلدەر بار. قاۋىپسىزدىككە بايلانىستى كەلگەننەن كەيىن ولار باقىلاۋعا الىنۋى ءتيىس»، - دەدى ول.

ەلجان ءبىرتانوۆ زايساندا «قىتاي ازاماتتارى كەلىپ جاتىر» دەگەن جالعان اقپارات تاراپ كەتكەنىن ايتىپ ءوتتى.

«ول ارينە، دۇرىس ەمەس. وتكەن تاۋلىك بويىنشا ماسەلەن مايقاپشاعايدان ەشكىم وتكەن جوق. كۇندەلىكتى كوپ بولسا شىعىس قازاقستان بويىنشا 10-15 ادام وتەدى. ولاردىڭ ءبارى - ءبىزدىڭ ازاماتتار. الماتى وبلىسى بويىنشا 20-30 ادام وتەدى. البەتتە ولار ەلگە كەلگەننەن كەيىن ارى قاراي ينفەكتسيانى تاراتۋ قاۋپىن بولدىرماۋ ءۇشىن الدىن الۋىمىز قاجەت. سوعان بايلانىستى سول جەردە ارنايى كارانتيندىك ستانتسيا اشۋىمىز كەرەك. سونداي بۇيرىعىمىز بولعان. ازاماتتار تۇسىنبەگەن. سول اۋىلدىڭ امبۋلاتورياسىنا جاتقىزادى دەپ... شەشىم بويىنشا ءبىزدىڭ ارنايى ستاتسيونار - زايسان اۋدانىنىڭ ورتالىق اۋرۋحاناسىنداعى ارنايى بولەك ينفەكتسيالىق اۋرۋعا ارنالعان كورپۋسقا جاتقىزىلاتىن بولادى. بولسا ارينە (...)»، - دەدى ول.

مينيستر سونىمەن قاتار شىعىس قازاقستاندا ينۆەستيتسيالىق جوبالار بويىنشا جۇمىس ىستەپ جاتقان قىتاي ازاماتتارى بارىن جاسىرمادى.

«قۇپيا جوق. ولاردىڭ اراسىندا دا جاقىندا قىتايدان كەلگەن ازاماتتار دا بار. ولار ءبىزدىڭ باقىلاۋىمىزدا. تىركەلگەن اۋرۋ ادامدار جوق. ولاردىڭ دەنساۋلىعى دۇرىس بولسا ارى قاراي جۇمىس ىستەۋگە مۇمكىندىك بەرۋىمىز كەرەك. سەبەبى ولاردىڭ كەلىسىمشارتتار بويىنشا ءوز جاۋاپكەرشىلىكتەرى بار»، - دەدى ول.