اسقار مامين ەلورداداعى سپورت جانە مادەنيەت ينفراقۇرىلىمدارىن تەكسەردى

نۇر- سۇلتان. قازاقپارات – ق ر پرەمەر- ءمينيسترى اسقار مامين بيىل ەلوردا كۇنىنە وراي پايدالانۋعا بەرۋ كوزدەلگەن نۇر- سۇلتان قالاسىنداعى جەڭىل اتلەتيكا سپورت كەشەنى مەن قازاق دراما تەاترىنىڭ قۇرىلىس جۇمىستارىنىڭ بارىسىن تەكسەردى.بۇل تۋرالى ق ر ۇكىمەتىنىڭ باسپا ءسوز قىزمەتى حابارلادى.

ءباسپاسوز قىزمەتىنىڭ مالىمەتتەرىنە قاراعاندا، جەڭىل اتلەتيكا سپورت كەشەنى حالىقارالىق دەڭگەيدەگى ق ر- نىڭ سپورت ينفراقۇرىلىمىنىڭ باستى نىساندارىنىڭ بىرىنە اينالادى.

نىسان تۇران داڭعىلى مەن ۇلى دالا كوشەسىنىڭ قيىلىسىندا 9 گا اۋماقتاعى ۋچاسكەدە سالىنىپ جاتىر. كەشەن 14 جۇگىرۋ جولى، ۇزىندىققا جانە سىرىقپەن سەكىرۋگە ارنالعان سەكتورلارى بار اتلەتيكالىق يادرو الاڭىنان، جولدارىنىڭ ۇزىندىعى 25 م، ەنى 11 م باسسەيننەن، ەكى كىرىكتىرىلگەن جۇگىرۋ جولى بار كوتەرگىش پلاتفورمامەن جابدىقتالعان 5*5 م ولشەمدى باسسەيننەن، 36 ورىنعا شاقتالعان سپورتشىلارعا ارنالعان قوناقۇيدەن، اتلەتيكالىق زالدان، ۇزىندىعى 160 م جۇگىرۋ جولى بار جاتتىعۋ ترەگىنەن، يادرو لاقتىرۋ، بيىكتىك پەن ۇزىندىققا سەكىرۋ سەكتورلارىنان تۇرادى. مىنبەلەر 6838 ورىنعا ەسەپتەلگەن.

قازاق دراما تەاترىنىڭ قۇرىلىسى ا. بايتۇرسىنوۆ، ج. ناجىمەدەنوۆ، ق. امانجولوۆ جانە سارىكول كوشەلەرىنىڭ اراسىنداعى 6 گا اۋماقتاعى ۋچاسكەدە ءجۇرىپ جاتىر. عيماراتتا 600 ورىندىق ۇلكەن زال، 200 ورىندىق كامەرالى زال، ارت- گالەرەيا، مەيرامحانا، سالتاناتتى كەزدەسۋلەر زالى، گريمەر بولمەسى جانە باسقا دا اكىمشىلىك، تەحنيكالىق، سانيتارلىق- تۇرمىستىق بولمەلەر بار.

ۇكىمەت باسشىسى بارلىق قۇرىلىس جۇمىستارىن ساپالى ورىنداپ، نىسانداردى جوسپارلانعان مەرزىمدە پايدالانۋعا بەرۋدى تاپسىردى.

نىسانداردى ارالاۋعا «سامۇرىق- قازىنا» ۇلتتىق ءال- اۋقات قورى» ا ق باسقارما ءتوراعاسى ا. ەسىموۆ، نۇر- سۇلتان قالاسىنىڭ اكىمى ا. كولگىنوۆ، مادەنيەت جانە سپورت ۆيتسە- ءمينيسترى ە. رامازانوۆ جانە باسقالارى قاتىستى.